Masat për fundvit, sekuestrohen mijëra kapsolla në Bulqizë

Në prag të festave të fundvitit, Policia e Shtetit ka nisur një operacion për sekuestrimin e kapsollave. Sipas informacioneve zyrtare, ditën e djeshme, operacioni është kryer në Bulqizë, ku janë sekuestruar 7680 kapsolla. Në këtë rast, Policia bëri të ditur se ka vënë nën hetim dy pronarët e dy dyqaneve. Konkretisht, në dyqanin në pronësi të shtetasit me inicialet A. K., ku u gjetën dhe u sekuestruan në cilësinë e provës materiale 120 pako, me 60 kapsolla secila, dhe në dyqanin në pronësi të K. K., ku u gjetën dhe u sekuestruan në cilësinë e provës materiale 8 pako, me 60 kapsolla secila. Ndërkohë, Policia njofton se do të vijojë kontrollet në të gjithë territorin, në subjekte të ndryshme, "Për mënyrën, kushtet dhe kriteret e magazinimit e përdorimit të lëndëve piroteknike e fishekzjarrëve". Strukturat e Policisë së Shtetit, në bashkëpunim me institucionet e tjera të Task- Forcës së krijuar në vitin 2018, po intensifikojnë kontrollet për verifikimin e kushteve të prodhimit, magazinimit, tregtimit dhe përdorimit nga subjektet e licencuara të lëndëve piroteknike dhe fishekzjarrët. Janë evidentuar dhe organizuar shërbime në vende e objekte private, banka, zyra të këmbimit valutor, tregje, lokale dhe objekte ku administrohen vlera monetare e materiale, për të parandaluar ngjarje kriminale. Gjithashtu, strukturat e Policisë do të organizojnë takime me subjektet e shërbimit privat të sigurisë fizike ( SHPSF), për përforcimin e shërbimeve të sigurisë së objekteve, si dhe gjatë shoqërimit dhe transportimit të vlerave monetare. Drejtoritë Vendore të Policisë Durrës, Tiranë e Lezhë kanë marrë masa ekstra në drejtim të ruajtjes së pronës, sidomos në ato zona që u goditën nga tërmeti, me qëllim parandalimin e vjedhjes së pronës. Policia e Shtetit, nëpërmjet këtyre masave synon që festat e Krishtlindjes dhe Vitit të Ri të kalojnë në mënyrë sa më festive dhe të mos veniten nga episode të mundshme paligjshmërie. "Nisur edhe nga përvoja e viteve të kaluara apo e ngjarjeve të ndodhura, Policia e Shtetit ka vlerësuar si të domosdoshme marrjen e disa masave shtesë, si dhe kalimin e të gjitha strukturave të Policisë në gatishmëri ( shërbim të përforcuar)", është shprehur Albert Dervishaj.