Elvana Gjata këndon "Me tana" në Nju Jork
Arilena flet për orkestrën, Alketa tregon problemet teknike
4 ditë pas Festivalit të 58t të Këngës, debati për 2 finalistët vijon ende. Ndërsa ekspertët e fushës, këmbëngulin për një këngë ku të harmonizohen të gjithë komponentët dhe e shikojnë këngën fituese "Shaj" të Arilena Arës, si një përfaqësuese dinjitoze. Elementë të showbizit, si dhe admiruesit e Elvana Gjatës vijojnë të mos e pranojnë rezultatin, duke u shprehur se një këngë skenike, si "Me tana", do t'i jepte më shumë mundësi Shqipërisë në Eurovizion. Elvana është shkëputur nga atmosfera e festivalit dhe nga Tirana ka udhëtuar drejt New York- ut, ku ka mbajtur një koncert për Krishtlindje. Si gjithmonë, me një "llok" të kuruar, e ndoshta kësaj here më ekstravagante, Gjata, me fansat e saj, ka kënduar edhe këngën "Me tana". Ndërkohë që mediat kanë bërë publike edhe fjalët e këngëtares, thënë fill pas shpalljes, si fituesja e vendit të dytë në këtë edicion të 58- të të Festivalit. "Nuk ka kupë, nuk ka festival që mund ta kthejë atë që publiku më ka dhënë këto 15 vjet karrierë. Absolutisht që nuk mund t'ju gënjej se çdo konkurrues dëshiron që të fitojë, por unë ndihem e fituar vërtet. Ndihem e fituar që ditën që kam nxjerrë këngën. Të gjithë shqiptarët më kanë bërë ' repost' dhe e ndiej që e duan këngën. Nuk gënjej për këtë gjë, dhe ata nuk gënjejnë kur ma thonë", thotë Gjata për mediat.
Ndërsa Arilena është distancuar nga kjo valë e debatit të postfestivalit, që këtë vit mori përmasa edhe më të mëdha. Ndonëse menjëherë pas spektaklit, ajo u shpreh se gëzonte respekt për punën 15- vjeçare të Gjatës në tregun muzikor, vëmendjen ditën e djeshme ua ka dedikuar atyre që e ndihmuan në realizimin e këngës, që siç tregon, është e para që përshkruan ndjesitë e saj personale. "Çfarë emocioni... falënderoj gjithë superskuadrën time, bashkëpunëtorët e mi që kanë qenë pranë meje gjithmonë, pa kushte". Ara nuk harron t'i shprehë mirënjohjen kompozitorit Darko Dimtrov, prania e të cilit, dhe e kolegëve të tij, që nuk kanë nënshtetësi shqiptare, edhe pse është brenda rregullores së spektaklit, nuk u ka pëlqyer disa muzikantëve shqiptarë, pasi sipas tyre, në këtë formë kënga shqiptare, në këtë ngjarje të rëndësishme, humb identitetin e vet. Mirëpo Ara ka theksuar se ka bashkëpunuar me Dimtriov që në fillimet e tij, duke realizuar këngë të suksesshme, kështu duke qenë brenda rregullores, nuk ka pasur asnjë arsye se pse ta shmangte përfaqësimin me këngën e një profesionisti si ai. Ndërsa Arilena, në postimin e ditës së djeshme, nuk ka harruar të falënderojë edhe Orkestrën, duke e konsideruar si "profesioniste", për sa i përket anës teknike. Gena dhe Alketa pohojnë të ketë pasur probleme. "10 sekonda përpara se të dal në skenë, teknika ndërhyn për të dytën herë në kufjet e mia, duke më lënë të dyshoj që diçka nuk shkonte mirë", thotë Gena, duke iu referuar natës finale. Po ashtu, edhe Alketa, duke bërë falënderimet e saj për këngëtaren italiane Giusy Ferreri, tregon se ka pasur probleme gjatë duetit me të. "Me kufjet e prishura, por ia dola ta çoj deri në fund", shprehet ajo.