FLET KREU I ISSH
Shpërblimi, datat e ndarjes së bonusit për pensionistët
Drejtori i ISSH sqaron si do ndahet bonusi 3 mijë lekë për 663 mijë pensionistët. Çfarë ndodh nëse nuk tërhiqet para 31 dhjetorit dhe datat e ndarjes për çdo kategori
Prej kësaj të mërkure, në çdo zyrë të Postës Shqiptare ka nisur ndarja e shpërblimit për pensionistët. Edhe pse një ditë pushimi, nga ISSH- ja mësohet se vetëm dje janë gjeneruar mbi 72 mijë pagesa për të moshuarit.
"Në datën 24, qeveria mori vendimin për shpërblimin e pensionistëve në masën e 3 mijë lekëve. Instituti i Sigurimeve Shoqërore, edhe pse e sotmja ( dje) ishte një ditë pushimi, është angazhuar për kryerjen e kësaj pagese. Deri në orët e pasdites, nga të dhënat që ne kemi, janë gjeneruar mbi 72 mijë pagesa. Sportelet e Postës kanë qëndruar të hapura deri në mbrëmje, duke iu dhënë mundësinë pensionistëve që të marrin shpërblimin", pohon kreu i ISSH- së, Astrit Hado. Sipas tij, çeku i fundvitit mund të tërhiqet në pikat e shpërndarjes së pensionit. Ndërkohë, për ata që e marrin pensionin në bankë, pagesat do të nisin duke filluar nga dita e sotme. "Shpërblimi mund të tërhiqet pranë çdo dege të Postës Shqiptare. Ndërkohë, për ata që e marrin nëpërmjet bankës, duke filluar nga nesër ( sot) do të kenë mundësi që krahas pensionit, të tërheqin edhe çekun në vlerën e 3 mijë lekëve", thekson më tej Hado.
PENALITETET
Çfarë i shqetëson më së shumti pensionistët është fakti që nëse nuk do të arrijnë ta marrin bonusin brenda këtij muaji, a rrezikojnë ta humbasin atë? Drejtori i ISSHsë thotë se nëse do të ketë pensionistë që nuk do të arrijnë të marrin shpërblimin, sipas grafikut të datave të caktuara nga ky institucion, nuk duhet të shqetësohen, pasi mund ta tërheqin atë në muajin janar. Fondi, vë në dukje Hado, është fond i posaçëm, për pasojë i paprekshëm. "Pensionistët nuk penalizohen, edhe nëse nuk arrijnë ta tërheqin shpërblimin sipas grafikut të bërë publik nga Instituti i Sigurimeve Shoqërore. Kjo, për vetë faktin që fondi në adresë të pensionistëve për shpërblimet e fundviti është i paprekshëm. Në këto kushte, edhe nëse do të ketë pensionistë, që për një arsye apo për një tjetër s'do të mund ta merrnin brenda këtij muaji, nuk duhet të shqetësohen, pasi mund ta përfitojnë ata në muajin pasardhës".
GRAFIKU
Sipas ISSH- së, shpërblimi do të tërhiqet bashkë me pensionin. Pra, ditën kur kanë për të tërhequr pensioni mujor, të moshuarit do të kenë mundësi të marrin edhe shpërblimin në vlerën e 3 mijë lekëve. Për ata të cilët e kanë tërhequr më parë, është lënë në dispozicion një datë e caktuar dhe një fashë orari nga ora 14: 00 deri në orën 20: 00. "Instituti i Sigurimeve Shoqërore ka gjeneruar shpërblimin në sistemin informatik dhe janë gati në portalin e pagesave, për t'u paguar për të gjithë përfituesit. Njëkohësisht, janë garantuar dhe transferuar fondet te Posta Shqiptare si agjent pagues". Sa u takon atyre që e tërheqin pensionin përmes bankës, bëhet me dije se transferta do të kryhet po atë datë. "Pensionistët që e tërheqin pensionin pranë bankave të nivelit të dytë, në datën e pagesës së pensionit do t'iu transferohet edhe masa e shpërblimit". Gjithsej janë 6 kategori të cilat do të përfitojnë shpërblim me rastin e festave të fundvitit. Kështu, të drejtën për të tërhequr bonusin e përvitshëm do ta kenë të gjithë ata që marrin pension pleqërie, pension invaliditeti, pension familjar dhe pension social. Po ashtu, pensionistët në fshat, punonjësit nëntokës, ishushtarakët, si dhe veteranët. Në skemë janë përfshirë edhe ata, të cilët dalin në pension këtë muaj. Qeveria ka vendosur të mos e penalizojë këtë kategori, duke e bërë pjesë të përfitimit. "Të drejtën për të përfituar shpërblimin në masën e përcaktuar në pikën 1, të këtij vendimi, e kanë edhe ata persona që kanë si datë të fillimit të pensionit deri në datën e hyrjes në fuqi të këtij vendimi". Fondi për shpërblimin e pensionistëve këtë vit kap vlerën e rreth 20 milionë dollarëve.