Meta kthen ligjet e reja për mediat si antikushtetuese: Ka elemente të censurës, kufizohet liria e shprehjes
Pollo: Mosdekretimi, mundësi për të ruajtur demokracinë
Pas dekretit të Presidentit Meta për të kthyer në Kuvend për rishqyrtim dy ligjet për mediat, kanë ardhur reagimet e para nga opozita dhe organizatat e medias. I pari që përshëndeti këtë vendim të Presidentit Meta ishte Unioni i Gazetarëve Shqiptarë. Përmes një deklarate të shpërndarë për mediat, UGSH e cilëson këtë vendim të Metës si një fitore të kauzës së tyre për të mbrojtur të drejtën e fjalës dhe lirinë e shprehjes në Shqipëri. Ndër të tjera, Unioni i Gazetarëve Shqiptarë thekson se kjo paketë ligjore u kundërshtua me forcë nga të gjithë aktorët mediatikë në vendin tonë. "Unioni i Gazetarëve Shqiptarë përshëndet vendimin e Presidentit të Republikës Sh. T. Z Ilir Meta për kthimin për rishqyrtim në Kuvend të paketës së ashtuquajtur Antishpifje, e cila u refuzua gjatë nga UGSH, organizatat e tjera të gazetarëve brenda vendit, si dhe nga organizatat më prestigjioze ndërkombëtare. Ky vendim konfirmon drejtësinë e qëndrimit të organizatës sonë në këtë kauzë në mbrojtje të lirisë së shprehjes", thuhet në deklaratën për shtyp të UGSH. Kjo organizatë bashkë me disa të tjera në vend ishin nismëtaret e një protestë para Kuvendit, ditën kur dy ligjet shkuan për miratim. Ky vendim i tyre erdhi pasi më herët, gjatë diskutimeve në Komisionet Parlamentare, kishin shprehur kundërshtinë e tyre për disa nene të ligjeve, por pa mundur dot që të ndikojnë te deputetët e opozitës, që shprehën vullnetin për t'i shkuar kësaj nisme deri në fund, siç dhe faktikisht bënë. Ndërsa nga ana e opozitës, reagimi ka ardhur nga ish- deputeti i Partisë Demokratike, Genc Pollo. Përmes një postimi në rrjetet sociale, Pollo e cilëson këtë vendimmarrje të Presidentit Meta si një mundësi për t'u rikthyer edhe një herë në themelet e Kushtetutës dhe të demokracisë. Më tej, Pollo thekson se pas kthimit në Kuvend të këtyre dy ligjeve duhet të ketë një rifillim të betejës politike ndaj maxhoranës, por edhe deputetëve që u futën rishtas, pasi PD dhe LSI lanë mandatet. "Kthimi në Kuvend i ligjit antifjalë nga Presidenti, një mundësi për të ruajtur një themel kushtetues të demokracisë, që është fjala e lirë. Me gjithë sojin e deputetëve të kësaj legjislature, beteja duhet rifilluar", shkruan ish- deputeti Genc Pollo. Më herët, para se të miratohej në Kuvend kjo paketë, të gjithë krerët e opozitës e patën kundërshtuar atë, duke cilësuar si hapin e radhës të Kryeministrit Rama për të instaluar një regjim të gjithin në duart e tij. Sipas opozitës, me këtë ligj Rama po tentonte të merrte në dorë edhe të fundit pushtet që i kishte mbetur jashtë kontrollit, atë të mediave on- line.