Arrestimi i 18 efektivëve, Gjykata liron zyrtarët e Inspektoratit
Tetëmbëdhjetë punonjësit lejonin ndërtimet pa leje në Durrës, të arrestuarit: S'kemi bërë asgjë. Efektivi, probleme me zemrën
"Shfryhet" operacioni "Abuzuesit", që çoi në pranga 18 persona, mes tyre 11 policë, inspektorë qendrash administrative dhe ndërtues.
Gjykata e Durrësit ka liruar dhjetë prej të arrestuarve dhe vetëm për tetë prej tyre nuk e ndryshoi masën e sigurisë, atë të arrestit në burg. Për dhjetë personat që ndryshoi masa e sigurisë, gjyqtari Paulin Cera vendosi "Detyrim paraqitjeje" dhe "Pezullim nga detyra". Prokuroria kërkoi "Arrest në burg" për të gjithë të arrestuarit, por pasi dëgjoi edhe argumentimin e avokatëve të të pandehurve, Cera vendosi që dhjetë prej tyre t'ua ndryshonte masën e sigurisë. Në fund të seancës, kur gjyqtari dha vendimin, personat që mbetën në burg reaguan mjaft ashpër. "Bravo ju qoftë! Merreni me ne. Ne s'kemi bërë asnjë shkelje. Merruni me ata që e kanë bërë këtë vend dhe e kanë katandisur në këtë derexhe", u dëgjua një zë nga cepi ku ishin vendosur të arrestuarit.
RIVLERËSIMI
Nën masa të rrepta sigurie, 18 zyrtarët dhe policët e arrestuar në Durrës e Shijak dolën dje para togave të zeza për rivlerësimin e masës së sigurisë, në Gjykatën e Rrethit Gjyqësor Durrës. Të arrestuarit e operacionit "Abuzuesit" u pritën para Gjykatës nga të afërmit dhe familjarët e tyre, të cilët nuk u lejuan të merrnin pjesë në seancën e rivlerësimit të masës së sigurisë. Procesi zgjati për më shumë se dhjetë orë, nisi rreth orës 09: 30 dhe përfundoi rreth orës 20: 00. Për shkak të numrit të lartë të të arrestuarve, ata nuk i zuri as kafazi i xhamit në sallën e gjyqit. Procesi maratonë u zhvillua me dyer të mbyllura, pasi gjyqtari Paulin Cera kërkoi të respektohej kërkesa e prokurorit Afrim Shehu, që në fillim kishte kërkuar që seanca të zhvillohej pa praninë e medias dhe të afërmve të të arrestuarve, pasi cenohej hetimi. Ndërsa zhvillohej seanca, Agim Osmani, ndihmës specialist në Policinë e Durrësit, ka pasur probleme shëndetësore dhe është dërguar me urgjencë në spital. Ai mori ndihmën e parë mjekësore dhe mësohet se ndodhet jashtë rrezikut për jetën. Policët dhe inspektorët vendorë të Durrësit, Shijakut e Manzës akuzohen se kundrejt pagesave, që varionin deri në disa mijë euro, kanë lejuar ndërtime të shumta pa leje. Me anë të kësaj skeme abuzive, ata shmangnin zbatimin e legjislacionit në fushën urbanistike dhe sigurimit teknik të tyre. Kjo veprimtari është kryer kryesisht gjatë vitit 2019. Disa prej efektivëve të Policisë po ashtu dyshohen se nuk kanë raportuar ngjarjet kriminale dhe më tej akoma, kanë fshehur kallëzimet e bëra nga qytetarët.
OPERACIONI
Katër ditë më parë, Drejtoria Rajonale e Shërbimit për Çështjet e Brendshme dhe
Ankesat ( SHÇBA) Durrës, në bashkëpunim e nën drejtimin e Prokurorisë së Rrethit Gjyqësor Durrës, arrestoi një sërë zyrtarësh policorë, inspektorë vendorë, përfaqësues të pushtetit lokal e ndërtues, të akuzuar për veprën penale "Shpërdorim detyre", që është shtrirë përgjatë vitit 2019 në vende dhe kohë të ndryshme. Arrestimi i tyre u bë në kuadër të një hetimi disamujor, me metoda speciale, ku u dokumentua me prova ligjore veprimtaria e kundraligjshme e subjekteve të këtij procedimi, të cilët, duke keqpërdorur atributet që u jepte detyra dhe funksioni, në bashkëpunim me njëri- tjetrin, por dhe me shtetas të tjerë, kanë konsumuar veprën penale të "Shpërdorimit të detyrës" dhe "Ndërtim të paligjshëm, në bashkëpunim". Subjektet e këtij procedimi penal kryenin funksione publike në Policinë e Shtetit, nëpunës të njësive administrative, IKMT- ve dhe INUV- it në Durrës, Shijak dhe Manzë.
AKUZA
Katër ditë më parë, Drejtoria Rajonale e Shërbimit për Çështjet e Brendshme dhe Ankesat ( SHÇBA) Durrës, në bashkëpunim e nën drejtimin e Prokurorisë së Rrethit Gjyqësor Durrës, arrestoi një sërë zyrtarësh policorë, inspektorë vendorë, përfaqësues të pushtetit lokal e ndërtues, të akuzuar për veprën penale "Shpërdorim detyre", që është shtrirë përgjatë vitit 2019 në vende dhe kohë të ndryshme.