Gati “lirimi” i Kajmakut të Vorës, Basha: Po hetohen 15 bashkiakë të PS
“Një provë se me Ramën do kemi kryebashkiakë t ë inkriminuar”
Kryetari i Bashkisë së Mallakastrës, Qerim Ismailaj, nuk do të jetë kryebashkiaku i fundit që denoncohet nga opozita si i inkriminuar.
Kryetari i PD- së, Lulzim Basha, në një intervistë për “Abc News”, tha se me ndihmën e ndërkombëtarëve, selia blu po verifikon edhe 15 kryetarë bashkie të tjerë të dalë nga zgjedhjet e 30 qershorit. Më tej, lideri i opozitës shtoi se mes kryetarëve të bashkive të dalë nga zgjedhjet e 30 qershorit, ka persona të dënuar për vjedhje, trafik drogë dhe qenie njerëzore. “Ne jemi në ndjekje edhe të 15 rasteve të tjera me ndihmën e partnerëve ndërkombëtarë. Duket qartë që procesi i 30 qershorit, përveçse jo kushtetues, është një provë më shumë e depërtimit total të trafikantëve të drogës, të vajzave dhe pjesëtarëve të krimit në kupolën e Edi Ramës. Është një thirrje për PS- në, për t’u tërhequr nga gremina ku e ka çuar lidershipi aktual, duke e kthyer në partinë më të kriminalizuar të globit. Është interes kombëtar edhe për PD- në depolitizimi i politikës”, tha kryedemokrati Basha. Mosreagimin e Kryeministrit Edi Rama në lidhje me kryebashkiakët e denoncuar, kryetari i opozitës e sheh si një tentativë për të shumuar problemin e kriminalizimit të politikës. Basha bën apel që t’i kërkohet llogari Kryeministrit Rama për emrat që ka zgjedhur të vendosë në krye të pushtetit lokal. “Të gjithë ata njerëz janë përzgjedhur nga Edi Rama, i cili është njeriu që sot duhet të flasë, por që hesht. Edi Rama heshti kur kryebashkiaku i Lushnjës u sulmua me granatë në zyrën e tij, hesht për kryebashkiakun e Mallakastrës, i cili është provuar me rekorde kriminale në shtetin fqinj, Greqi. Ndaj, sot është dita, sot është dita që mikrofonin tuaj t’ia drejtoni njeriut që i emëroi në këto zyra dhe që hesht, sikur nuk ka ndodhur asgjë. Kur në fakt, është një provë më shumë se me Ramën do kemi kryebashkiakë me rekorde kriminale. Shqiptarët do vazhdojnë të drejtohen nga krimi, sa kohë që Rama të jetë Kryeministër”, vijoi Basha. REFORMA ZGJEDHORE Reforma Zgjedhore ishte kryefjala e diskutimeve politike javën që lamë pas. Mosndryshimi i sistemit zgjedhor, për momentin krijoi pakënaqësi edhe brenda PD- së, por teksa u pyet për këtë çështje, kreu i selisë blu u shpreh se kampi opozitar është i unifikuar në qëndrim e problemi më i madh nuk është sistemi, por shitblerja e votës. “Opozita është e bashkuar dhe e njëtrajtshme në qëndrimin se problemi kryesor i vendit është shitblerja e votës dhe mosndëshkimi i krimit elektoral. Është po kështu e njësuar që në një dialog gjithëpërfshirës me qytetarët shqiptarë, t’i lëmë ata të vendosin për sistemin zgjedhor”, tha kryedemokrati Basha. Sakaq, ditën e djeshme, kreu i selisë blu thirri në një takim sekretarin e përgjithshëm, Gazment Bardhin, dhe sekretarin për çështjet zgjedhore, Ivi Kason. Këtë javë pritet që opozita të mbyllë paketën e saj për Reformën Zgjedhore.