Meta kthen Paketën Antishpifje: Bie ndesh me parimet e Kushtetutës
“Ligjet përmbajnë elemente censuruese, që kufizojnë lirinë e shprehjes, krijojnë mjedis të pasigurt ndaj operatorëve mediatikë”
Presidenti Meta i ktheu të dyja ligjet "Për mediat audiovizive" dhe "Për komunikimet elektronike", të quajtura ndryshe si Paketa Antishpifje, për rishqyrtim në Kuvend.
Kreu i shtetit i ka gjykuar si të papranueshme këto dy ligje. Në arsyetimin e publikuar për vendimmarrjen e tij, Meta thotë se ligjet bien ndesh me Kushtetutën e Shqipërisë dhe me një sërë konventash ndërkombëtare për të drejtat e njeriut. Në ligjin "Për mediat audiovizive në Republikën e Shqipërisë", kreu i shtetit e vë theksin në rolin e madh që merr AKEP në drejtim të kontrollit të tregut mediatik. Përveç rregullave të shtuara dhe përmirësimin e kuadrit ligjor për mbrojtjen e të miturve në media, pjesën tjetër të këtij ligji Meta e cilëson si të papajtueshme me të drejtën e shprehjes dhe normat ndërkombëtare të të drejtave të njeriut. "Miratimi i këtyre dispozitave në thelb përmban elemente censuruese të drejtpërdrejta, që kufizojnë të drejtën e lirisë së shprehjes dhe të medias. Kjo gjendje censure krijohet përmes aplikimit të masave ndëshkuese joproporcionale që këto dispozita parashikojnë, masa që mund të vlerësohen dhe vendosen nga organe administrative, të cilat në kundërshtim të hapur me rendin e brendshëm kushtetues dhe ligjor, u jepet fuqia që t'i vënë në ekzekutim të menjëhershëm këto masa, përpara se të ketë një vendimmarrje përfundimtare dhe të formës së prerë mbi ligjshmërinë e tyre", shkruan Meta. Më tej Presidenti thotë se në ligj ka instrumente që mund të stimulojnë autocensurën. "Hyrja në fuqi e këtyre ndryshimeve do të krijojë një mjedis arbitrar dhe të pasigurt ndaj operatorëve mediatikë elektronikë, për shkak të trysnisë së aplikimit pa kriter dhe subjektiv të masave ndëshkuese dhe shproporcionale që parashikon ligji i miratuar. Këto mekanizma joproporcionale të forcës ndëshkuese që përmbajnë ndryshimet ligjore të miratuara, krijojnë hapësirë që ato të aplikohen përkundrejt mediave on- line, që janë kritike me punën e qeverisë. Kjo e fundit, përmes përfaqësuesve të saj në organet vendimmarrëse dhe kompetencave që këto organe marrin, ka të gjitha mundësitë të shfrytëzojë këtë bazë ligjore që lejon interpretim subjektiv, të ndëshkojë në mënyrë të padrejtë çdo media, e cila nuk i përshtatet vullnetit politik të shumicës. Ky realitet do të prodhonte frikësimin dhe autocensurën, mbylljen apo pezullimin me pa të drejtë të mediave elektronike, duke ndikuar drejtpërdrejt në cilësinë dhe objektivitetin e informacionit, çka do të prodhonte furnizimin e publikut me fakte ndryshe nga realiteti, që jo vetëm keqorientojnë shoqërinë në kërkimin e të drejtave të tyre, por dhe në përmbushjen e përgjegjësive qytetare për ndërtimin dhe ruajtjen e vetë demokracisë", shkruan Presidenti. Gjithashtu Kreu i thekson se kjo paketë ligjore nuk i përgjigjet kërkesave të tregut mediatik shqiptar. "Presidenti i Republikës, në vlerësim të të gjitha problematikave të impaktit të lajmeve dhe medias në tërësi, krahasuar me rregullimet e parashikuara me ligjin nr. 91/ 2019, vlerëson se ky ligj nuk u përgjigjet nevojave të zhvillimit dhe pritshmërive të publikut dhe komunitetit të gazetarëve dhe medias, si dhe nuk garanton mirëfunksionimin e tyre. Ky ligj, për shkak të këtyre dispozitave shumë problematike, jo vetëm që nuk sjell rregullimin e pritshëm, por për disa çështje thelbësore ai bie ndesh me parimet dhe normat kushtetuese", shkruan ndër të tjera Meta në arsyetimin e tij për mosdekretimin e ligjit "Për mediat audiovizive". Ndërsa për ligjin tjetër të Paketës Antishpifje, "Për komunikimet elektronike", Meta veçon faktin se lufta kundër lajmeve të rreme dhe shpifjeve mund të bëhet në mënyra alternative. "Shqetësimet për përhapjen e lajmeve të rreme apo ndikimit negativ të dezinformimit, duhet të adresohen në mënyrë të tillë që çdo mjet ligjor mbrojtës ndaj këtyre fenomeneve të mos rrezikojë në asnjë rast, të vendosë në disbalancë, apo të krijojë rrezikun e keqpërdorimit të këtyre mjeteve ligjore për të cenuar të drejtën për informacion, lirinë e shprehjes dhe të medias apo dhe lirinë për veprimtari ekonomike, të drejta këto që gëzojnë mbrojtje të posaçme nga Kushtetuta dhe aktet ndërkombëtare", shkruan Presidenti. Në fund të arsyetimit të tij për kthimin e këtyre dy ligjeve, Meta bën edhe një thirrje për reflektim për Kuvendin. Sipas tij, një mungesë e reflektimit nga deputetët mund të përkeqësonte besueshmërinë e Shqipërisë, si një vend demokratik dhe i shtetit të së drejtës.