Integrimi, Greqia kusht Shqipërisë me censusin
Përfaqësuesi i qeverisë greke: Transparencë në census me minoritetin
Vota e Greqisë për hapjen e negociatave të Shqipërisë me BE- në do të varet nga regjistrimi i minoritetit grek gjatë censusit kombëtar që do të zhvillohet këtë vit. Kostandino Vllasi, përfaqësues i qeverisë greke, u bëri dje thirrje minoritarëve të marrin pjesë në censusin e 2020- ës. Ai theksoi se transparenca e qeverisë shqiptare gjatë censusit do të dëshmojë nëse të drejtat e minoritetit grek respektohen. "Transparenca prej qeverisë shqiptare gjatë censusit të 2020- ës do të dëshmojë nëse të drejtat e minoritetit respektohen, ndërsa pjesëmarrja e minoritetit në proces do të garantojë se ne si komunitet nuk bëjmë gabimet e së shkuarës, duke kontribuar në reduktimin e numrit të minoritetit grek në Shqipëri. Nëse minoritarët nuk marrin pjesë në census, do të bëjnë të njëjtat gabime të së kaluarës", është shprehur Kostandino Vllasi. Këtë deklaratë, Vllasi e bëri gjatë ceremonisë së 29 vjetorit të krijimit të OMONIA- s. Kreu i PBDNJ, Vangjel Dule, foli me tone të ashpra ndaj qeverisë shqiptare. Sipas tij, qeveria ' Rama' ka dështuar t'u përgjigjet kërkesave të kohës në lidhje me ruajtjen dhe respektimin e të drejtave të minoritetit. "Qeveria e zotit Rama që mban dhe kryesimin e OSBE- së, ka dështuar që t'u përgjigjet kërkesave të kohës në lidhje me të drejtat e minoriteteve. Që prej vitit 2017, tetor, Parlamenti votoi një ligj për të drejtat e minoriteteve, që për mendimin tonë nuk u përgjigjej kërkesave të kohës. Megjithatë, që nga ai ligj, i cili kërkonte një numër vendimesh të Këshillit të Ministrave për t'u konsideruar i plotë dhe që qeveria ishte angazhuar në BE se do t'i plotësonte deri në maj të vitit 2018, ende sot, janar 2020, nuk është ndërmarrë asnjë hap konkret. Nga ana tjetër, është sfida e regjistrimit të ardhshëm të popullsisë pas regjistrimit të dështuar të vitit 2011. Ende ligji i kritikuar nga të gjithë organizmat ndërkombëtarë mbetet problematik dhe i paamenduar, sipas kërkesave të Këshillit të Europës", tha Dule. Sipas tij, problematike është edhe çështja e pronave të minoritetit në bregdet. "Nga ana tjetër, në realitetin tonë të përditshëm, pronat e pjesëtarëve të minoritetit etnik grek, kryesisht në zonën bregdetare të Jonit, por edhe në zona të tjera, janë objekt abuzimesh të vendimeve qeveritare dhe personalisht të zotit Rama. Nga ana tjetër, probleme kronike që kanë të bëjnë me vendosjen e tabelave dygjuhëshe ose me ruajtjen e trashëgimisë së pjesëtarëve të komunitetit etnik grek janë po aq problematike, në mos edhe më tepër. Ajo që është më negative, është se përgjegjësit e akteve vandale shpeshherë ndaj tabelave dygjuhëshe apo monumenteve, siç ishte ai i Thimio Lolit, janë ende të paidentifikuara dhe këtu duhet shtuar se edhe pse në shkelje të të gjitha afateve kohore, ende nuk kemi një informacion zyrtar për vrasjen e Kostandino Kacifas, tetorin e vitit 2018. Këto problematika jo vetëm që nuk trajtohen sistematikisht nga qeveria, por atyre iu shtohen dhe problematika të reja", deklaroi Dule.