Negociatat, Presidenti i KE: Të jepet një sinjal për Shqipërinë
Vizita në Shqipëri, dy muaj e gjysmë para samitit të Zagrebit
Eurokomisioneri i ri për Zgjerimin, Olivér Várhelyi, do të vizitojë më 16 janar Shqipërinë.
Dy muaj e gjysmë para se Këshilli Europian të vendosë nëse do të çeli ose jo negociatat me vendin tonë dhe Maqedoninë e Veriut, komisioneri për zgjerimin, gjatë vizitës në Tiranë, do të ketë takime me Presidentin Ilir Meta, Kryeministrin Rama dhe Kryetarin e Kuvendit, Gramoz Ruçin. Gjithashtu, eurokomisioneri ka lajmëruar takime edhe me përfaqësuesit e opozitës, por pa caktuar nëse do të jenë deputetët e rinj apo PD- ja dhe aleatët. Varhelyi pritet t'u përcjellë krerëve të shtetit shqiptar rezervat dhe kërkesat që kanë Kryeministri francez dhe ministri i Jashtëm holandez, pasi i ka takuar më herët. Po ashtu, vizita në Tiranë vjen pas takimeve të eurokomisionerit me përfaqësuesit politikë në Maqedoninë e Veriut. Ndërkohë, Presidenti i Këshillit Europian Charles Michel, pas një takimi me Kryeministrin e Sllovakisë, Peter Pellegrini, deklaroi se është e nevojshme të jepet një sinjal i qartë me unanimitet për zgjerimin e vendeve si Shqipëria dhe Maqedonia e Veriut. "Unë mendoj se është shumë e rëndësishme të japim një mesazh të qartë, një pozicion të qartë - kemi nevojë për më shumë siguri, më shumë stabilitet në botë në përgjithësi, por edhe te fqinjët tanë. Dhe kjo është arsyeja pse ne duhet të diskutojmë midis liderëve mundësinë për të modernizuar procesin e zgjerimit nga njëra anë dhe mundësitë që të japim me unanimitet, një sinjal të qartë për vendet e ndryshme si Shqipëria apo si Maqedonia e Veriut", tha Presidenti i Këshillit Europian. Në fund të marsit, në mbledhjen e Këshillit Europian, pritet të merret vendimi nga shtetet anëtare të unionit në lidhje me negociatat për Tiranën dhe Shkupin.