Efektivi i Policisë la të lirë të kërkuarin për përdhunim
Specialisti i Krimeve në Manzë është lënë në burg nga Gjykata, pasi ndaj tij rëndon akuza e shpërdorimit të detyrës, duke lënë të lirë një person të kërkuar për përdhunim. Sipas dosjes së Prokurorisë, Ermand Petova, më datë 9 nëntor 2019, ka referuar material hetimor për një person me emrin Sami H., i cili akuzohej nga një vajzë me iniciale V. J., se kishte kryer me forcë dhe pa dëshirën e saj marrëdhënie seksuale në makinën e tij. Pas disa veprimeve hetimore, Prokuroria ka nisur hetime dhe ka ngarkuar oficerin Petova të Policisë Durrës të ndjekë rastin konkret, me qëllim arrestimin e këtij personi të akuzuar si përdhunues. "Më datë 05.11.2019, nga ana e specialistit të krimeve, nënkomisarit E., janë referuar materialet në
Prokurorinë pranë Gjykatës së Shkallës së Parë Durrës, për shtetasin S., i datëlindjes 25.09.1987, banues në fshatin R., Durrës, me arsim 8 klasë, i papunë, sepse më datë 03.11.2019 ka bërë kallëzim shtetasja V., se në mesin e muajit qershor 2019, në fshatin Rrotull, gjatë rrugës për në shtëpi, në automjet ka kryer marrëdhënie seksuale pa dëshirën e saj dhe është raportuar se po punohet për kapjen e tij, për veprën penale ' Marrëdhënia seksuale me dhunë me të rritura'.
Ky shtetas është shpallur në kërkim më datë 05.11.2019, me kartelë ngjyrë ' rozë', pasi akuzohet për veprën penale ' Marrëdhënie seksuale me dhunë me të rritura'. Specialisti i krimeve E. ka raportuar se ka vajtur për kontroll banese te banesa e shtetasit S. dhe nuk e ka gjetur në banesë. Nga bisedat telefonike me personin në kërkim rezulton se ka njohje me të dhe është në dijeni se ndodhet në banesë dhe nuk kryen detyrën funksionale për të shoqëruar dhe kryer veprimet procedurale. Nga transkriptimi i bisedave telefonike rezulton se ka dijeni dhe punonjësi i Policisë P.", thuhet në dosjen e Prokurorisë së Durrësit.