Kurti: Jam i gatshëm të mbyllem diku me LDK, derisa të merremi vesh!
Lëvizja Vetëvendosje ka mbajtur të dielën mbledhjen me qendrat e partisë, në lidhje me situatën politike në vend dhe kërkesat e LDK- së për koalicionin, për të cilin ai thotë se po bëhet shumëçka, që të arrihet. Kurti ka kujtuar se partia e tij kishte premtuar se nuk do të bënte asnjëherë koalicion me partitë e PAN- it. Po ashtu, një premtim të tillë elektoral e ka bërë edhe LDK- ja. Partia e Mustafës ka thënë se nuk do të bëjë koalicion me asnjë parti tjetër, përveç Vetëvendosjes. “Ne kemi filluar kontaktet, komunikimin dhe takimet më 7 tetor me LDKnë, vetëm disa orë pas shpalljes së rezultatit të zgjedhjeve preliminare... por ajo që na dukej lehtë e arritshme, doli të jetë e mundimshme”, tha Kurti, duke shtuar se “këto bisedime nuk janë të lehta. Edhe më të rënda na presin bisedimet në të ardhmen, si qeveri me faktorë të ndryshëm”. Sipas tij: “Sigurisht që kemi mundur e është dashur të arrijmë marrëveshje deri më tani... Pasnesër bëhen 100 ditë që prej zgjedhjeve të 6 tetorit...”. Ai shtoi se 52 ditë i kanë humbur duke pritur a po ia kalojnë pragun njëri- tjetrit. “Ndonëse e kemi ditur që kjo nuk luan fare rol në renditjen e subjekteve tona, se kjo nuk mund ta ndryshojë fitoren e Lëvizjes VETËVENDOSJE! Së fundmi, unë jam ekspozuar dy herë në mënyrë të rrezikshme: më 26 dhjetor, jam ekspozuar para dy milionë qytetarëve dhe gjithë deputetëve të Kuvendit, pa pasur marrëveshje me LDKnë; dhe mandej, në takimin te Presidenti, sërish u detyrova të shkojë pa marrëveshje me LDK- në, por së paku kisha gjysmën e kabinetit tim të bërë publik”, theksoi ai. Kurti tha se në takimin e fundit me LDK- në ka pasur lëvizje, pasi sipas tij, të dyja palët kanë bërë nga një propozim; por nuk tregon se çfarë kanë propozuar. “Jam i gatshëm të takohemi përditë, edhe të mbyllemi në ndonjë vend derisa të merremi vesh, por këtë mund ta them për veten, jo për palën tjetër”, tha Kurti.