Vokshi: Kur të vijmë në pushtet, i anulojmë të dyja ligjet

Ish- deputetja e PD- së, Albana Vokshi, në një deklaratë për shtyp nga selia e PD- së doli në mbështetje të dekreteve të Presidentit Meta për t’i rikthyer në Kuvend dy ligjet e Paketës Antishpifje. Vokshi u shpreh se Rama do që të kalojë me nxitim Paketën Antishpifje për të fshehur të vërtetën e bashkëqeverisjes, por PD do ta anulojë menjëherë sapo t’i besohet qeveria. Ndër të tjera, ajo e cilësoi dekretin e Presidentit për kthimin në Kuvend për rishqyrtim, si një vendim të drejtë në mbrojtje të fjalës së lirë. “Kthimi i dy ligjeve të censurës së medias online nga Presidenti i Republikës është një hap i duhur në mbrojtje të fjalës së lirë. Ky është një vendim i drejtë, që një Kryeministër normal do ta shikonte si mundësi për t’i tërhequr ligjet antidemokratike. Edi Rama e ka sot jetike mbylljen e gojës së mediave, sidomos ato kritike online. Misioni i Edi Ramës është të censurojë të vërtetën e keqqeverisjes së tij dhe bashkëdrejtimin e vendit me një grusht oligarkësh dhe kriminelësh. Edi Rama e ka sot jetike të fshehë të vërtetën e një krize të rëndë ekonomike që ka përfshirë vendin, të vërtetën për mijëra familje që janë në të ftohtë, pa strehë, pa ujë, pa drita, pa ngrohje, pa ilaçe e pa vakte të plota për fëmijët e tyre. Partia Demokratike i konsideron këto dy ligje si antikushtetuese, që shkelin konventat ndërkombëtare, që censurojnë lirinë e fjalës dhe të drejtën e qytetarëve për informim. Duke inkurajuar gazetarët të mos tremben nga censura qeveritare, Partia Demokratike angazhohet për të anuluar këto dy ligje në momentin e parë që ajo do të ketë besimin për të qeverisur vendin”, u shpreh Vokshi.