Topalli e lidh me vendimin e Gjykatës për Bashën, Patozi ironizon
Ish- nënkryetarja e PD- së, Jozefina Topalli, thumboi dje kryedemokratin Basha pas tryezës së parë të maxhorancës dhe opozitës për Reformën Zgjedhore. Ish- kryetarja e Kuvendit dhe një ndër figurat e vjetra të Partisë Demokratike, Jozefina Topalli, reagoi përmes një mesazhi në rrjetet sociale. Ajo shkroi se kundërshtarët u rikthyen sërish në krah të njëri- tjetrit, pasi Gjykata pushoi çështjen, duke nënkuptuar me këtë vendimin e Gjykatës së Tiranës për të pushuar hetimin për falsifikim ndaj Lulzim Bashës. "Ja kështuuu … pasi pushoi ' çështjen Gjykata' … rikthehen përsëri në krahët e njëri- tjetrit", shkruan Topalli. Ndërsa pas saj reagoi edhe kreu i Bindjes Demokratike, Astrit Patozi. Ky i fundit nuk e ka kursyer ironinë, duke shkruar se përshëndet dorëheqjen e parevokueshme të Kryeministrit Rama, ndërkohë ngre dyshime se pas dakordësisë për tryezën e Reformës Zgjedhore gjithçka mund të ndodhë. "Më në fund, një lajm i shumëpritur për qytetarët shqiptarë. Përshëndes dorëheqjen e parevokueshme të Edi Ramës, Kryeministrit të qeverisë së krimit dhe të drogës, që i hapi rrugë dialogut konstruktiv mes maxhorancës dhe opozitën parlamentare dhe atë jashtëparlamentare për të mirën e Shqipërisë. Që prej sot, gjithçka është e mundur…", shkroi Patozi. Në takimin e parë të opozitës dhe përfaqësuesve të maxhorancës për Reformën Zgjedhore, u dakordësua që hartimi dhe diskutimi i reformës të bëhet jashtë Parlamentit në tryezën politike të partive. Drafti përfundimtar të miratohet në mënyrë transparente, gjithëpërfshirëse, konsensuale mes partive politike. Po ashtu, u dakordësua që drafti i përgatitur nga tryeza politike të miratohet pa ndryshime nga Komisioni dhe Parlamenti.