Trump: Senati të bllokojë hetimin, po i jepni besueshmëri gjuetisë së shtrigave
Dhoma e Përfaqësuesve e Kongresit Amerikan do të votojë sot për dërgimin e akuzave në Senat për hetimin e Presidentit Donald Trump. Kryetarja e Dhomës së Përfaqësuesve, Nancy Pelosi, thirri një takim në Uashington, duke i dhënë fund bllokadës së dërgimit të aktakuzave në Senat, që zgjati pothuajse një muaj që kur Dhoma e Përfaqësuesve votoi pro neneve të abuzimit të pushtetit të Trump dhe pengimit të Kongresit. Pelosi sugjeroi që Dhoma e Përfaqësuesve të votojë të mërkurën për dërgimin e aktakuzës dhe emërimin e një demokrati për të ndjekur këtë rast, sipas AP. Ky veprim nis gjykimin e tretë të një Presidenti në historinë amerikane. Gjykimi duhet të fillojë brenda disa ditësh. Drejtuesi i shumicës republikane në Senat, Mitch McConnell, u takua me senatorët e Partisë Republikane për të negociuar kushtet e gjykimit. Republikanët nuk arritën dot të plotësonin kërkesën e Trump për të refuzuar gjykimin e tij. Trump ka shkruar mesazhe në përpjekje për të hedhur poshtë nenet kundër tij, duke thënë se Senati “po u jepte besim” akuzave kundër tij duke mbajtur një gjykim. “Shumë besojnë se Senati i jep besim një gjykimi të bazuar në asnjë provë, asnjë krim... në vend të një refuzimi të plotë, i jep besim Gjuetisë së Shtrigave nga demokratët e njëanshëm, që në rast të kundërt nuk do ta kishin. Unë pajtohem!”, ka shkruar Trump. Për të kundërshtuar nenet e fajësimit do të duheshin 51 vota. Republikanë të shumtë, duke përfshirë Senatoren Susan Collins ( Maine) dhe Rob Portman ( Ohio), kanë treguar që ata do të kundërshtojnë një mocion për të refuzuar gjykimin, duke argumentuar se ekipi ligjor i Trump dhe menaxherët e fajësimit të Dhomës së Përfaqësuesve duhet të jenë në gjendje të ngrenë çështjen e tyre. Senatori republikan, Roy Blunt, u tha reporterëve të hënën se grupi republikan i Senatit nuk i ka votat për t’i hedhur poshtë nenet e fajësimit kundër Presidentit Trump, i cili kërkoi “refuzim të menjëhershëm” të hetimit.