Lamtumirë Fehmi Hoshafit, ndahet nga jeta themeluesi i kinokomedisë
“Nuk është emri që e bën njeriun, por njeriu që e bën emrin”, fjalët e kineastit që la gjurmë të pashlyeshme në kinematografi
“Nuk është emri që e bën njeriun, por njeriu që e bën emrin”.
Fehmi Hoshafi do t’i shqiptonte këto fjalë afro 3 vite më parë, kur përtej syzeve të errëta e skenarëve që mbante në çantën e dorës, ëndërronte një Tiranë e Shqipëri më të mirë. Regjisori i “Ëndërr për karrige”, “Zëvendësi i grave”, “Kapedanit” ( bashkëregjisor me Muharrem Fejzon), “Shoku ynë Tili” etj., u nda dje nga jeta në moshën 86- vjeçare, por për më shumë se 50 vite krijimtari, mund të thuhet pa dyshim se emrin e tij e gdhendi me shkronja të arta në kinematografinë shqiptare.
Hoshafi do të kujtohet për punën e tij artistike 30vjeçare pranë Kinostudios, ku u mor me realizimin e filmave artistikë dhe dokumentarë, në regji dhe përgatitje skenarësh. Po ashtu, përgjatë këtyre 2 dekadave ai ka botuar edhe mjaft krijime letrare. I lindur në Tiranë, fillimet e karrierës i pati si asistent i regjisorëve veteranë, Hysen Hakani dhe Kristaq Dhamo, në filmat e tyre: “Toka jonë”, “Vitet e para”, “Oshtimë në bregdet”, “Gjurma” etj. Në vitin 1968 realizoi vetë spektaklin “Estrada në ekran”, i cili u xhirua nga Kinostudio në formën e një filmi artistik. Prej suksesit që pati ky film, iu besua më vonë në vitin 1972 regjia për kinokomedinë aq të dashur “Kapedani”, të cilin e realizoi së bashku me regjisorin Muharrem Fejzo. Ky film shënon lindjen e kinokomedisë në kinematografinë shqiptare e që u pasua më vonë me kinokomedi të tjera po aq të dashura nga regjisori Hoshafi, si “Ëndërr për një karrige” apo “Zëvendësi i grave”. Në periudhën 1976 – 1990 realizon edhe filma të tjerë artistikë dhe dokumentarë, ndër të cilët filmi “Shoku ynë Tili”.
Për ndarjen nga jeta të mjeshtrit të kinematografisë kanë shprehur ngushëllimet njerëz të artit e kulturës, si dhe ministrja e Kulturës Elva Margariti. “Shprehim ngushëllimet tona për ndarjen nga jeta të regjisorit të mirënjohur shqiptar, Fehmi Hoshafi. Ai na solli në ekranet tona filma të pavdekshëm si ‘ Kapedani’, ‘ Ëndërr për një karrige’, ‘ Zëvendësi i grave’, ‘ Shoku ynë Tili’ dhe shumë të tjerë, duke i shtuar vlera kinematografisë shqiptare”, shkruan Margariti.
Homazh punës së regjisorit i bën edhe Arkivi Qendror Shtetëror i Filmit , duke sjellë në kujtesë veprën e themeluesit të zhanrit të komedisë në kinematografinë shqiptare.