Emrat e rinj, ISSH: Kush përfiton shtesë pensioni
Instituti i Sigurimeve miraton listën e re të minatorëve, metalurgëve dhe naftëtarëve që marrin shtesë pensioni. Emrat e 923 përfituesve në Tiranë e rrethe
Instituti i Sigurimeve Shoqërore ka përfunduar llogaritjen e shtesës për 923 pensionistë të tjerë, duke e çuar në 6600 numrin total të përfituesve.
Gazeta boton sot të plota tabelat e reja me emrat e përfituesve në Tiranë dhe rrethe.
HADO
Përmes një statusi në rrjetet sociale, kreu i ISSH- së, Astrit Hado, ka vënë në dukje se po punohet për mbylljen sa më shpejt të këtij procesi, për t'i dhënë gjithkujt atë që i takon të marrë pas miratimit të ligjit të ri. "Gjatë periudhës 08- 14 janar 2020 janë trajtuar me pension shtesë mbi pensionin e pleqërisë 923 persona, subjekt i ligjit 29/ 2019. Deri më datë 14 janar 2020, numri i personave subjekt i ligjit 29/ 2019 ' Për trajtimin financiar suplementar të punonjësve që kanë punuar në miniera në nëntokë, të punonjësve të industrisë së naftës e të gazit dhe të punonjësve që kanë punuar në metalurgji' ka arritur në 6600 përfitues. Nga specialistët e sigurimeve shoqërore po punohet me kapacitet të plotë për mbylljen sa më shpejt të këtij procesi dhe gjithkush të marrë atë që i takon", ka shkruar Hado në rrjetet sociale.
PROCESI
Duke qenë se ka ende nga ata pensionistë që nuk janë paraqitur për të dorëzuar kërkesë, atëherë vlen të theksohet se llogaritja e shtesës do të bëhet vetëm pas dorëzimit të kërkesës nga ana e tyre. Nga skema suplementare nuk mund të përfitojnë të gjithë, por vetëm ata që kanë ushtruar profesione të kategorizuara si të vështira dhe shumë të vështira. Përveç kësaj, kushti tjetër është plotësimi i pragut kontributiv, jo më pak se 6 vite në profesionet dhe punët e përcaktuara në ligj. Për minatorët, sipas ligjit, rritja do të jetë me 1 për qind për çdo vit pune në minierë, ndërsa për metalurgët dhe naftëtarët me 0.6 për qind. Kështu, për ata që kanë mbi 20 vite punë shtesa varion mesatarisht nga 12 për qind deri në 20 për qind mbi masën e pensionit. Në pesë vitet e para të zbatimit, skema suplementare do të mbulohet nga fondet e buxhetit të shtetit. Më pas, ligji parashikon rritje të masës kontributive me 5 për qind për ata që janë në marrëdhënie pune. Efektet financiare fillojnë nga data 5 korrik 2019, e cila është data kur ligji ka hyrë në fuqi. Sipas ISSH- së, janë rreth 23 mijë persona që përfitojnë nga skema e trajtimit suplementar, me një efekt financiar për vitin 2020 rreth 14 milionë dollarë.