Tryezë me katër palë për zgjedhjet, prapaskenat si u bind opozita të ulet me Qeverinë jashtë Kuvendit
Dakordësi për ngritjen e Këshillit të Reformës Zgjedhore, i cili do të prodhojë draftin që do t’i kalojë Kuvendit për votim
Kur askush nuk e kishte pritur dhe kur dukej se kriza politike nuk do të zgjidhej, PS, PD, LSI dhe Rudina Hajdari nga opozitarët në Kuvend janë ulur në një tryezë të përbashkët për të diskutuar për Reformën Zgjedhore.
Oerd Bylykbashi i PD- së dhe Petrit Vasili i LSI- së iu bashkuan dy bashkëkryetarëve të Komisionit të Reformës Zgjedhore, Gjiknuri dhe Hajdari, në një tryezë, që ishte refuzuar prej disa muajsh. Nga kjo tryezë u prodhua dhe një dokument, i cili pritet të jetë udhërrëfyesi i Reformës Zgjedhore deri në miratimin e saj në Kuvend me bazë rekomandimet e OSBE- ODIHR. Dokumenti në fjalë me 8 pika paraqet mënyrën e veprimit të palëve për të prodhuar një Reformë Zgjedhore, sipas standardeve të OSBE dhe të pranuara nga të gjitha palët. Ndër 8 pikat e këtij dokumenti që prodhoi kjo tryezë, ka çështje ku u është dhënë të drejtë kauzave të ngritura nga opozita e bashkuar. Ndërsa për çështje të tjera ka pika ku mund të shikohen si triumf për maxhorancën. Partia Demokratike dhe LSI, me anë të këtij dokumenti që prodhon kjo tryezë, ia del që në njëfarë mënyrë të imponohet mbi vendimet e Kuvendit, pasi pika 7 e marrëveshjes parashikon që në Kuvend do të miratohet një Reformë Zgjedhore, pasi të jetë dhënë aprovimi edhe nga opozita jashtë Parlamentit. Për Partinë Socialiste, nga ana tjetër kjo tryezë e përbashkët me opozitën që la Kuvendin një vit më parë, përbën një mundësi për ta përmbyllur reformën në 3- mujorin e parë, duke përmbushur kështu një nga kushtet e Bundestagut për çeljen e negociatave, edhe pse me vonesë, pasi gjermanët e kishin kërkuar para vitit 2020. Reforma Zgjedhore, që deri më tani ishte punuar në dy komisione paralele, atë parlamentar dhe atë të opozitës së bashkuar, do zhvillohet nga katër persona. Sipas këtij dokumenti, opozita e bashkuar do të zgjedhin dy persona që bashkë me Damian Gjiknurin dhe Rudina Hajdarin do bëjnë rregullimet, të cilat më pas do i kalojnë Kuvendit për votim. Në këtë marrëveshje palët janë treguar të kujdesshme për të parashikuar edhe situatat, për të cilat mund të mos bien dakord gjatë diskutimeve. Për këto raste në pikën 5 parashikohet që t’u jepet hapësirë ekspertëve ndërkombëtarë të OSBE, që do të vendosin për mënyrën më të mirë se si duhet të shkruhet në ligj. Palët në këtë tryezë kanë marrë edhe angazhim që në terma kohorë, kjo reformë duhet të përmbyllet brenda datës 15 mars. Nga katër pjesëmarrësit në këtë tryezë, Rudina Hajdari si bashkëkryetare e Reformës Zgjedhore dhe në njëfarë mënyrë përfaqësuese e opozitës në Kuvend rezervoi të drejtën e saj që të konsultohet me bashkëpunëtorët dhe më pas të shprehet në mënyrë përfundimtare.
DOKUMENTI I PLOTË Kuadri i bashkëpunimit për Reformën Zgjedhore 1. Formohet Këshilli Politik me përfaqësues të opozitës, drejtuesve të komisionit të Reformës Zgjedhore dhe përfaqësueseve të grupeve parlamentare në Kuvend.
2. Këshilli mblidhet brenda muajit janar 2020 dhe autorizon platformën e punës së procesit të Reformës Zgjedhore si më poshtë:
3. Një përfaqësi politike ( 2 persona) nga opozita jashtëparlamentare dhe ekspertë të saj do të punojnë me dy bashkëkryetarët e Komisionit të Reformës Zgjedhore dhe ekspertët e atashuar pranë tij.
4. Çështjet që do adresohen përcaktohen në vendimin e Kuvendit Nr. 102/ 2017, i amenduar, “Për ngritjen e komisionit të Reformës Zgjedhore”, përfshirë dhe planin e punës të miratuar me konsensus nga Komisioni në vitin 2017, si dhe çdo problematikë tjetër zgjedhore që palët bien dakord me konsensus, me qëllim arritjen e standardeve zgjedhore ndërkombëtare.
5. Palët e përfshira angazhohen të adresojnë me konsensus të gjitha çështjet e administrimit të zgjedhjeve, objekt i punës së Komisionit të Reformës Zgjedhore, përfshirë rekomandimet e OSBE/ ODHIR dhe për çështjet të cilat nuk gjendet dakordësi do të kërkohet mendim dhe asistencë nga ekspertiza ndërkombëtare e OSBE/ ODHIR, me qëllim gjetjen e një zgjidhjeje të pranueshme.
6. Për të ndihmuar në këtë proces, Komisioni i Reformës Zgjedhore do të kërkojë zyrtarisht asistencën e OSBE/ ODH1R, përfshirë dhe dërgimin e ekspertëve nëse kjo është e mundur, që do të bashkëpunojnë me përfaqësuesit politikë dhe ekspertët e përcaktuar në paragrafin e parë të kësaj pike, me qëllim për të lehtësuar procesin e diskutimit dhe hartimit të projekt- propozimeve përkatëse.
7. Projekti përfundimtar i dakordësuar mes palëve sipas këtij dokumenti do të miratohet nga Kuvendi në përputhje me procedurat parlamentare. Shumica angazhohet që të mos kryejë ndryshime në Komisionin e Reformës Zgjedhore dhe në seancë plenare në tekstin e miratuar dhe dakordësuar mes palëve sipas këtij dokumenti.
8. Palët angazhohen që reforma të përfundojë jo më vonë se 15 mars 2020.