Njerëz të Solemanit, Shqipëria dëbon dy diplomatë iranianë
"Shkon në 4 numri i të dëbuarve. Si u shpall ' non grata' ambasadori iranian me ndihmësin e tij dhe akuzat për terrorizëm"
Autoritetet shqiptare njoftuan dje se kanë urdhëruar dëbimin nga Shqipëria të dy diplomatëve iranianë, të cilët janë shpallur persona të padëshiruar.
Vendimi u bë i ditur nga ministri i Jashtëm në detyrë, Gent Cakaj, në një postim në "Facebook". Sipas tij, të dy diplomatët, Mohammad Ali Arz Peimanemati dhe Seyed Ahmad Hosseini Alast, kanë zhvilluar veprimtari në mospërputhje me statusin e tyre dhe parimet e Konventës së Vjenës për Marrëdhëniet Diplomatike. Pas këtij konstatimi, sipas Cakajt, ndaj dy përfaqësuesve të Republikës Islamike të Iranit është kërkuar largimi i menjëhershëm nga territori i Republikës së Shqipërisë. "Ministria për Europën dhe Punët e Jashtme ka vendosur sot që përfaqësuesit diplomatikë të Ambasadës së Republikës Islamike të Iranit në Shqipëri, z. Mohammad Ali Arz Peimanemati dhe z. Seyed Ahmad Hosseini Alast, të shpallen persona të padëshirueshëm, për shkak të zhvillimit të veprimtarisë në mospërputhje me statusin e tyre dhe parimet e Konventës së Vjenës për Marrëdhëniet Diplomatike. Dy përfaqësuesve të Republikës Islamike të Iranit u është kërkuar largimi i menjëhershëm nga territori i Republikës së Shqipërisë", shkruan Gent Cakaj në postimin e tij në rrjetet sociale. Burime të qeverisë shqiptare i thanë "Zërit të Amerikës" se dy diplomatët po dëbohen për aktivitete kundër grupit MEK, që është i strehuar prej disa vitesh në qendrën e ngritur në Manzë. Sipas tyre, atasheu kulturor Seyed Ahmed Hosseini Alast kishte mbajtur poste të larta në Gardën Revolucionare të Republikës Islamike dhe Mohamed Peimanemati ishte anëtar i njësisë operacionale të inteligjencës së Iranit, Mois, dhe ishte përgjegjës për disa akte terroriste në vendet e BEsë. Sipas burimeve të "Zërit të Amerikës", të dy diplomatët kishin qenë bashkëpunëtorë të Kasem Solemanit. Ky i fundit u ekzekutua pak javë më parë nga një dron i ushtrisë amerikane me urdhër të Presidentit të SHBA- ve, Donald Trump, për shkak se dyshohej se ishte truri i një serie sulmesh terroriste në Lindjen e Mesme, ku në disa prej tyre kishte pasur viktima shtetas amerikanë.
DËBIMI I AMBASADORIT
Kjo është hera e dytë që Shqipëria shpall persona të padëshiruar diplomatë iranianë. Në dhjetor të vitit 2018, ambasadori i Iranit në Shqipëri, Golamhosein Mohamadnia, dhe një tjetër diplomat i ambasadës u dëbuan nga vendi pasi dyshoheshin të ishin përfshirë në aktivitete që cenojnë sigurinë në vend. Në atë kohë, Ministria e Jashtme shqiptare saktësoi se vendimi ishte marrë në konsultim me vendet aleate, për shkak të aktivitetit të tyre në Shqipëri, në kundërshtim me statusin e tyre diplomatik. Vendimi ekstrem ndaj diplomatëve iranianë në vitin 2018 erdhi pas një aksioni të Policisë së Shtetit, që parandaloi një sulm terrorist, i cili ishte planifikuar të ndërmerrej në ditën e shënuar për besimtarët bektashi, të Sulltan Nevruzit. Parandalimi i këtij akti terrorist ishte bërë në bashkëpunim të ngushtë me inteligjencën izraelite, "Mosad", e cila kishte ngritur alarmin fillimisht në prag të ndeshjes eliminatore mes kombëtares shqiptare të futbollit dhe asaj të izraelite. Vendimi për t'i shpallur non grata dy diplomatët iranianë u përshëndet nga autoritetet më të larta amerikane, përfshirë edhe Presidentin, Donald Trump, i cili i dërgoi një letër falënderimi Kryeministrit Rama. Këshilltari për Sigurinë i Presidentit Trump, John Bolton, në atë kohë shprehu mbështetjen për qeverinë shqiptare, duke theksuar se vendimi kishte qenë i konsultuar me aleatët. "Kryeministri i Shqipërisë, Edi Rama, sapo dëboi ambasadorin iranian, duke sinjalizuar liderët iranianë se mbështetja e tyre për terrorizmin nuk do të tolerohet. Ne jemi me Kryeministrin Rama dhe popullin shqiptar, teksa ngrihen kundër sjelljes së rrezikshme të Iranit në Europë dhe botë", shkroi Bolton.