PD denoncon edhe kreun e Bashkisë Mat: Ishte i dënuar
“Komisioni Qendror i Zgjedhjeve lejoi Agron Malajn të kandidonte, edhe pse ligji i dekriminalizimit e ndalonte”
Ka shkuar në 5 numri i kryebashkiakëve socialistë të denoncuar nga Partia Demokratike si subjekte të ligjit të dekriminalizimit. Sekretari i Përgjithshëm i PD- së, Gazment Bardhi, i dërgoi dje një letër Kryeprokurorit të Përgjithshëm që të verifikojë figurën e kryebashkiakut të Matit, Agron Malaj, pasi sipas tij ish- gardisti i 21 janarit, Malaj, është në kushtet e ndalimit të mbajtjes së mandatit të kryetarit të bashkisë.
“Partia Demokratike i kërkon Prokurorisë së Përgjithshme dhe më pas Komisionit Qendror të Zgjedhjeve të veprojë pa asnjë vonesë me administrimin zyrtar të vendimit të Gjykatës së Matit dhe për heqjen e menjëhershme të mandatit për Kryetarin e Bashkisë së Matit, Agron Malaj. Sot është koha që ligji të veprojë dhe është koha që Edi Rama të mos fshihet pas Agron Malajt, Qerim Ismailajt, Valdrin Pjetit, Agim Kajmakut apo Mark Babanit, por të dalë dhe të marrë përgjegjësi dhe t’u shpjegojë qytetarëve shqiptarë se përse alternativa e tij e vetme është krimi”, tha Bardhi. Më tej, Sekretari i Përgjithshëm i PD- së tregoi vendimin e Gjykatës, ku Malaj ishte dënuar me 10 muaj burg për veprën penale armëmbajtje pa leje. “Agron Malaj rezulton se ndodhet në kushtet e ndalimit për të kandiduar në një funksion publik. Ai është i dënuar me vendim gjyqësor të formës së prerë për armëmbajtje pa leje dhe sipas ligjit për dekriminalizimin i ndalohet kandidimi përjetë në një funksion publik”, tha Bardhi. PD nuk e pati të vështirë të zbulonte rastin e Agron Malajt, pasi ky i fundit e kishte deklaruar në formularin e vetëdeklarimit se ka qenë i dënuar me 10 muaj burg për armëmbajtje pa leje.
KQZ Në 15 maj të vitit 2019,
Komisioni Qendror i Zgjedhjeve mori në shqyrtim rastin e formularit të Agron Malajt, por duke i konsideruar të dhënat e deklaruara si të paparashikuara në ligjin për “Për garantimin e integritetit të personave që zgjidhen, emërohen ose ushtrojnë funksione publike”, vendosi t’i hapë rrugë kandidimit të tij për Bashkinë e Matit. Ndërkohë, neni 4 i ligjit të dekriminalizimit e ndalon një gjë të tillë. Të pyetur nga gazeta “Panorama”, burime zyrtare nga Komisioni Qendror i Zgjedhjeve sqaruan se ky vendim u mor pasi më herët, në 2017- ën, për të njëjtën vepër penale, KQZ i hoqi mandatin e anëtarit të Këshillit Bashkiak në Lezhë, Ardian Markut. Por ky vendim u rrëzua më pas nga Gjykata me vendim të formës së prerë. Kështu, në 2019- ën KQZ mori si precedent rastin e 2017- ës në Lezhë për t’i hapur dritën jeshile Agron Malajt në Mat.