Përplasja me Qeverinë, Meta: Pse s’më shkarkon dot maxhoranca
“Maxhoranca nuk më shkarkon dot. Edhe sikur dekreti të ishte antikushtetues, nuk përbën shkak për shkarkim”
Presidenti i Republikës së Shqipërisë, Ilir Meta, e sheh si një mundësi të mirë për të nisur një dialog konstruktiv dhe të qëndrueshëm marrëveshjen e maxhorancës dhe opozitës për Reformën Zgjedhore.
Kreu i shtetit komentoi për herë të parë nga Kosova marrëveshjen e ditëve të fundit mes maxhorancës dhe opozitës së bashkuar. Teksa theksoi se viti që sapo lamë pas ishte plot me zhgënjime, ai bëri thirrje për ndërgjegjësim të palëve politike për të mos humbur më tepër kohë në drejtimin e integrimit. “Shpresoj se edhe një marrëveshje e arritur për çështjen e Reformës Zgjedhore të jetë thjesht fillimi i një reflektimi të thellë dhe i vendosjes së një dialogu strukturor e të qëndrueshëm për çështje të interesit të përbashkët, që ndihmojnë integrimin europian të Shqipërisë, por edhe që ndihmojnë për një performancë tjetër të shqiptarëve në tërësi, në planin e qeverisjes dhe në planin e afirmimit ndërkombëtar”, tha Presidenti Meta në intervistën për emisionin “Rubikon” në Kosovë. Ndërkohë u shpreh besimplotë se drafti i dakordësuar do të përfundojë brenda afatit të përcaktuar nga të dyja kampet politike. Ashtu si opozita, edhe kreu i shtetit thotë se ka qenë presioni ndërkombëtar ai që i ka shtyrë palët për t’u ulur në një tryezë, e cila do çojë në përmbushjen e një prej 9 kushteve të Bundestagut gjerman. Por Meta bën diferencën kur thotë se presionin më të madh e ka pasur qeveria, për shkak se ka edhe përgjegjësitë më të mëdha. “Pa dyshim që ka qenë e njëjta për të gjitha subjektet politike, prandaj jemi këtu, sepse përgjegjësia është e përbashkët. Përgjegjësia është e mazhorancës, e cila kërkon të ushtrojë pushtete që dalin jashtë kufijve që ia përcakton Kushtetuta dhe që dëmtojnë rëndë parimin e balancës dhe kontrollit të pushteteve, që është i domosdoshëm për një funksionim demokratik të shtetit. Pa dyshim që përgjegjësia është edhe e opozitës, e cila zgjodhi rrugën e delegjitimimit të institucioneve përmes largimit nga Parlamenti, përmes mospjesëmarrjes në zgjedhjet vendore. Këtu nuk po nuk flasim për një përgjegjësi thjesht të një force apo të një individi të caktuar”, tha më tej kreu i shtetit.
SHKARKIMI Presidenti Ilir Meta u pyet edhe për nismën e maxhorancës për shkarkimin e tij, por ai tha se nuk kishte asnjë shqetësim për këtë çështje, pasi ishte i bindur se Partia Socialiste nuk mund ta shkarkojë dot. Meta vlerësoi se, edhe sikur akti i tij të mos ishte në përputhshmëri me Kushtetutën, kjo nuk përbën shkak për ta shkarkuar. “Maxhoranca e di shumë mirë se mua nuk më shkarkon dot. Për arsye se unë jo vetëm nuk e kam shkelur Kushtetutën, por edhe nëse një president mund të nxirrte një akt, pra nxjerr një dekret sikurse nxjerr Parlamenti një ligj apo qeveria nxjerr një vendim dhe vlerësohet se nuk është në përputhje me Kushtetutën, kjo nuk është kurrë një shkak për shkarkim, përkundrazi. Për më tepër që Kushtetuta e Shqipërisë e mbron në mënyrë të jashtëzakonshme Presidentin, për shkak se Presidenti është përfaqësues i interesave të shtetit”, vijoi Meta. Ndërkohë akuzoi maxhorancën se tenton të kërcënojë çdokënd dhe të kalojë përtej pushteteve të veta.
Shpresoj se edhe një marrëveshje e arritur për çështjen e Reformës Zgjedhore të jetë thjesht fillimi i një reflektimi të thellë dhe i vendosjes së një dialogu strukturor e të qëndrueshëm