Irani dhe kriza politike, dy porositë për ambasadoren e re të SHBA
Palmer takon ambasadoren e re të SHBA në Shqipëri për të zgjidhur krizën politike dhe Reformën në Drejtësi
Zv. ndihmëssekretari i Shtetit dhe i dërguari i veçantë për Ballkanin Perëndimor, Matthew Palmer, u takua me ambasadoren e re të SHBA- së në Shqipëri, Yuri Kim.
Pak para paraqitjes së letrave kredenciale te Presidenti i Republikës për të nisur zyrtarisht mandatin e saj si ambasadore në Tiranë, Yuri Kim duket se është konsultuar me njeriun që ka muaj që merret me Shqipërinë, krizën politike, por dhe Reformën në Drejtësi. Ambasada amerikane bën me dije se dy ishin çështjet, të cilat kanë shënjuar vitin 2020 për botën dhe Shqipërinë, konflikti SHBAIran si dhe marrëveshja mes palëve politike në Shqipëri për Reformën Zgjedhore. Ambasada amerikane e konsideron qëndrimin e Shqipërisë ndaj Iranit si të guximshëm dhe parimor, kurse lidhur me marrëveshjen për Reformën Zgjedhore, SHBA e konsideron pozitive. “Zv. ndihmëssekretari i Shtetit dhe i dërguari i veçantë për Ballkanin Perëndimor, Matthew Palmer, u takua me ambasadoren Yuri Kim për të diskutuar qëndrimin e guximshëm dhe parimor të Shqipërisë mbi Iranin, si dhe lajmin pozitiv lidhur me përkushtimin ndërpartiak për të realizuar Reformën Zgjedhore në përputhje me rekomandimet e OSBE/ ODIHR. # SHBAQëndronKrahShqipërisë”, thuhet në njoftimin e ambasadës amerikane në Tiranë. Një javë më parë, Yuri Kim u betua si ambasadore e Shteteve të Bashkuara në Shqipëri, e cila u emërua nga Presidenti Donald Trump në qershor të vitit të shkuar. Ajo ka thënë se do të nxisë udhëheqësit e Shqipërisë për të zgjidhur ngërçin aktual politik, në mënyrë që të forcohet perspektiva e hapjes së negociatave të anëtarësimit në BE. Në fjalën e saj para Senatit amerikan, zonja Kim ka thënë gjithashtu se do të inkurajojë Shqipërinë të zbatojë plotësisht Reformën në Drejtësi. Ajo është shprehur se sheh si përparësi edhe ndihmën teknike për Shqipërinë në hetimin, ndjekjen dhe ndëshkimin e korrupsionit dhe krimit të organizuar ndërnacional. Ambasadorja Kim pritet gjithashtu të inkurajojë Shqipërinë për të arritur nivelin 2 për qind në shpenzimet e mbrojtjes deri në vitin 2024.