Gjiknuri: Nëse do ketë dakordësi, diskutojmë edhe për sistemin zgjedhor

Përfaqësuesi i Partisë Socialiste në Këshillin Politik të Reformës Zgjedhore, Damian Gjiknuri, nuk ka përjashtuar mundësinë e diskutimit të ndryshimit të sistemit zgjedhor. Në një prononcim për mediat ditën e djeshme pas mbledhjes së parë të Këshillit Politik, Gjiknuri tregoi se cili do të jetë objekti i punës së grupit të punës për Reformën Zgjedhore me përfaqësuesit e maxhorancës dhe opozitës. “Ju kemi thënë dhe po e përsëris, prioritet për këtë grup pune që punon me Komisionin e Reformës Zgjedhore është objekti i punës së Komisionit të Reformës Zgjedhore, çështjet e administrimit zgjedhor, pse jo edhe çështjet e sistemit zgjedhor nëse do ketë një dakordësi. Tani, konotacionet politike dhe deklaratat politike që njëra palë ia bën tjetrës, ne jetojmë në politikën shqiptare, e rëndësishme është të fokusohemi”, tha Gjiknuri. Sakaq, ai lajmëroi se të hënën Komisioni i Reformës Zgjedhore do t’i dërgojë një letër ODIHR- it nëse mund të dërgojë ekspertin e saj ndërkombëtar. “Ditën e hënë, Komisioni i Reformës Zgjedhore do t’i dërgojë letër

ODIHR- it për të kërkuar ekspertin ndërkombëtar, i cili mund të vijë në Shqipëri në qoftë se është e mundur, për të mediuar dhe për të punuar me palët”, vijoi bashkëkryetari i Reformës Zgjedhore. Duke filluar nga java e ardhshme, Gjiknuri u shpreh se do të vijojnë takimet e përditshme mes ekspertëve dhe përfaqësuesve politikë për të përgatitur sa më parë draftin e dakordësuar. “Nga ana tjetër, nga e hëna dhe më tutje, pse jo përditë, të fillojë puna mes përfaqësuesve të opozitës jashtëparlamentare dhe ekspertëve të tyre që të punojnë me përfaqësuesit e Komisionit të Reformës Zgjedhore, siç është parashikuar në marrëveshje. Kjo, me synim që këtë periudhë ta shfrytëzojmë në mënyrë maksimale që t’u japim një Kod të ri Zgjedhor shqiptarëve”, vijoi deputeti socialist. Ndërkohë, Gjiknuri u kujdes të mos bënte deklarata politike. Tryeza e ditës së martë ka parashikuar mekanizmin zhbllokues edhe në rastet kur mes maxhorancës dhe opozitës nuk ka dakordësi për formulimin e një amendamenti në Kodin Zgjedhor. Në të tilla raste, formulimi do të bëhet nga eksperti i ODIHR- it.