Mblidhet Këshilli Politik për Reformën, zbardhen 7 kërkesat që propozon PD
“Qëndrimi i opozitës përputhet 100% me prioritetet e OSBE/ ODIHR. Nga shitblerja e votës, te mosndëshkimi i krimeve zgjedhore”
Këshilli Politik që do të merret me Reformën Zgjedhore u konstituua dje me një përfaqësi anëtarësh 5 nga opozita e bashkuar dhe 5 nga Kuvendi.
Nga radhët e opozitës jashtë Kuvendit ishin Oerd Bylykbashi i PD- së, Petrit Vasili i LSI- së, Fatmir Mediu i PR- së, Mesila Doda e PDIU- së dhe Vangjel Dule i PBDNJ- së. Ndërsa nga radhët e PS- së ishin Damian Gjiknuri dhe Ervin Bushati, të cilët kishin në krahë edhe opozitarët parlamentarë, Alban Zeneli, Rudina Hajdari dhe Nimet Musai. Takimi i parë i këtij Këshilli, i cili do të jetë organi që do të merret me reformën nga ana politike, vendosi krijimin e një grupi ekspertësh që do të punojnë për të mbyllur të gjitha çështjet e reformës duke u bazuar në rekomandimet e OSBE/ ODIHR. Grupi do të ketë 6 anëtarë, 2 të opozitës, 2 nga Kuvendi dhe 2 ndërkombëtarë. Në mbyllje të takimit, përfaqësuesi i PDsë, Oerd Bylykbashi, u shpreh se në këtë takim, përveç konstituimit të Këshillit, u vendos edhe listimi i prioritete të punës, që sipas tij do të fillojë nga lufta kundër shitblerjes së votës, manipulimi i listave dhe deri te cenimi i votës së lirë. “Sapo u konstituua Këshilli Politik sipas dokumentit të kompromisit për fillimin e Reformës Zgjedhore, dokument i cili përcakton procedurën se në çfarë mënyre do të ecë kjo Reformë Zgjedhore, e cila duhet të mbyllet brenda 15 marsit. Ky Këshill autorizon përfaqësuesit politikë dhe ekspertët që të operojnë me konsensus. Ky konsensus duhet të qëndrojë deri në momentin e miratimit, siç është dakordësuar në dokumentin e kompromisit dhe ajo që ne bëmë të ditur, qëndrimin e opozitës së bashkuar, i cili do të bëhet publik është prioriteti i çështjeve, që përputhet 100% me prioritetet që përcakton OSBE/ ODIHR: lufta kundër shitblerjes së votës, presioni mbi zgjedhësit, presioni mbi zgjedhësit, që janë punonjës të administratës, abuzimi me burimet shtetërore, manipulimi i listave, keqpërdorimi i Policisë së Shtetit, cenimi i sekretit të votës, cenimi i lirisë së votës. Këto janë ato çështje që reforma do t’i trajtojë me prioritet dhe, sigurisht, të trajtojë të gjitha çështjet e tjera pa asnjë përjashtim, duke pasur parasysh arritjen e rekomandimeve dhe standardeve të OSBE/ ODIHR- it. Ky dokument do bëhet publik dhe besoj që nga ky moment detyra e përfaqësuesve politikë dhe ekspertëve është të ecin shpejt me hartimin e reformës brenda një periudhe sa më të shkurtër, brenda 15 marsit. Unë nuk kam ç’të shtoj asgjë nga dokumenti i kompromisit. Aty bëhet shumë e qartë. Kuvendi i Shqipërisë duhet ta miratojë atë që do të dalë me konsensus, pa asnjë ndryshim”, u shpreh Oerd Bylykbashi.
DOKUMENTI Në këtë takim, përfaqësuesit e opozitës shkruan një dokument me 7 pika. Dokumenti në fjalë, përveç renditjes së prioriteteve të punës, përcakton edhe punën që do të bëjë këshilli politik si dhe krijimi i një grupi ekspertësh me përfaqësues nga opozita dhe nga Kuvendi. Në këtë dokument theksohet se diskutimi për Reformën do duhet të jetë i hapur dhe pas të gjitha përmirësimeve në Kuvend të miratohet i pandryshuar dokumenti që do të kalojë në mënyrë konsensuale nga Këshilli Politik. Gjithashtu, në fokus të punës së grupit të ekspertëve do të jetë edhe çështja e financimit të partive gjatë fushatës elektorale. Çështja e sistemit zgjedhor lihet e hapur si mundësi për t’u diskutuar. Në dokumentin me 7 pika të opozitës që u paraqit në Këshillin politik të Reformës, një vend të veçantë kishte edhe çështja e dënimit të krimeve elektorale në zgjedhjet e shkuara, për të cilat, sipas PD- së, fakte janë paraqitur nga mediat në vitet e fundit.