“Me pjesëmarrjen në tryezë morëm përgjegjësitë që na takojnë për integrimin”
Kryetarja e LSI- së, Monika Kryemadhi, e ka cilësuar si marrje përgjegjësish pjesëmarrjen e opozitës në Këshillin Politik të Reformës Zgjedhore. Në një komunikim me gazetarët, Kryemadhi u shpreh se për opozitën bashkëpunimi për reformën është një ndihmë që të plotësohet një nga kushtet e Bundestagut për hapjen e procesit të negociatave. Më tej, kryetarja e LSI- së theksoi se tashmë i takon maxhorancës që të plotësojë pjesën tjetër të kushteve për t’i hapur negociatat. “Ne morëm përgjegjësinë tonë përpara qytetarëve për të realizuar Reformën Zgjedhore, e cila është e domosdoshme për të krijuar dhe për të hapur rrugën e vazhdimit të mëtejshëm të reformave dhe të të gjitha situatave të tjera. Sigurisht që ne si opozitë e bashkuar jemi në unison të plotë për sa i përket këtij procesi dhe sot mbledhja e Këshillit Politik, e cila u dakordësua në takimin e ditës së martë, do të ketë pjesëmarrjen e përfaqësuesve të opozitës së bashkuar, ku pjesëmarrës për Lëvizjen Socialiste për Integrim do të jetë z. Petrit Vasili, i cili ka qenë edhe pjesë e këtij dakordësimi dhe më pas për të ecur përpara me hapa sa më të shpejtë, në mënyrë të tillë që ne si opozitë e bashkuar të jemi shumë më përpara sa i përket edhe datës 15 mars. Më pas, me firmosjen e asaj dakordësie të atij dokumenti, që është realizuar në bashkëpunim edhe me partnerët tanë ndërkombëtarë, detyrimet e opozitës kanë mbaruar. Tashmë detyrimet janë të maxhorancës për të ecur përpara me kushtet e tjera dhe për ta realizuar sa më shpejt që të jetë e mundur”, deklaroi Kryemadhi.