Rama e padit për shpifje, Haradinaj: Diversion politik
Padia: “Haradinaj me deklaratat e tij ka cenuar nderin, personalitetin, reputacionin dhe dinjitetin e Ramës”
Ashtu siç kishte p a r a l a j m ë r u a r , Kryeministri i Shqipërisë, Edi Rama, paditi homologun e tij kosovar, Ramush Haradinaj. Padia prej 30 faqe e Ramës kundër Haradinajt është depozituar ditën e mërkurë në Gjykatën Themelore në Prishtinë, sipas mediave në Kosovë.
Në këtë padi voluminoze, ku Rama kërkon dëmshpërblim për shpifjet që ai pretendon se Haradinaj ka bërë, prej tij janë të listuara një sërë deklaratash të Kryeministrit kosovar në detyrë, bërë në disa emisione politike në Prishtinë dhe në Tiranë. Në padi, Rama pretendon se në deklarimet e tij, Haradinaj ka mashtruar, duke rënduar së tepërmi imazhin e tij në publik. “Në datën 17.10.2019 e 29.10.2019, i padituri Ramush Haradinaj, në kohën e kryerjes së deklaratës, Kryeministër në detyrë i Republikës së Kosovës, më poshtë referuar edhe si ‘ i Padituri’, gjatë një interviste të dhënë gazetarit Artur Zheji e të publikuar në emisionin ‘ 360. gradë’, në datën 17.10.2019 si dhe gjatë intervistës së kryer në datën 29.10.2019 në emisionin televiziv ‘ Pressing/ Zona Pressing’, të publikuar në televizionin ‘ T7’ të Republikës së Kosovës, ka kryer deklarim publik të fakteve shpifëse e mashtruese në adresë të paditësit me pasojë cenimin e nderit, personalitetit, reputacionit dhe dinjitetit të paditësit me pasojat e parashikuara në legjislacionin e zbatueshëm”, thuhet në padi. Më tej, në këtë akuzë të Ramës ndaj Haradinajt, theksohet se çështja ka dominuar debatin politik dhe për shkak të akuzave Kryeministri i Shqipërisë është etiketuar si tradhtar. “Kjo çështje ka dominuar debatin publik që nga fundi i vitit 2018 dhe përgjatë vitit 2019, duke rezultuar në akuza deri për ‘ tradhti’, çdo herë e përkundrejt personave të pretenduar se gjatë këtij procesi dialogu kanë mbështetur idenë e të ashtuquajturit ‘ shkëmbim të territoreve në mes Kosovës dhe Serbisë’”, thuhet ndër të tjera në këtë padi. Në akuzën prej 30 faqesh thuhet se qëndrimi në vazhdimësi i Haradinajt për afera korruptive, për ta jetësuar idenë e shkëmbimit të territoreve, është mbajtur përkundër fakteve, që, sipas padisë, Rama asnjëherë nuk ka diskutuar për tema të tillë. Sipas mediave në Kosovë, në padi nuk ka një shifër sa i takon shpërblimit financiar që Rama kërkon nga Hardinaj në rast të një fitoreje të mundshme.
PËRGJIGJJA Kësaj padie të Ramës në Gjykatën e Prishtinës, Ramush Hardinaj i është përgjigjur në rrjetet sociale. Me anë të një mesazhi të shpërndarë në “Facebook”, Haradinaj shkruan se e ka mësuar lajmin përmes mediave dhe se shumë shpejt do të bëjë gati mbrojtjen ligjore. Sipas Kryeministrit në detyrë të Kosovës, akuza është e pabazuar dhe se qëllimi i vetëm është diversioni politik nga ana e homologut të tij shqiptar. Në mbyllje të këtij reagimi, Hardinaj bën edhe një paralajmërim, duke theksuar se Rama nuk do mund t’u shmanget përgjegjësive përmes inskenimeve dramatike në media. “Sot është raportuar në media se Kryeministri i Shqipërisë, Edi Rama, ka deponuar padi kundër meje në Gjykatë. Unë, sipas ligjit, do të përgatis përgjigje në padi, në afatet e përcaktuara ligjore. Padia e Kryeministrit Rama është plotësisht e pabazuar dhe një diversion politik që bëhet nga ana e tij, që të fshihet pas dramave mediale dhe t’i ikë përgjegjësisë. Kombi ynë dhe Kosova ka njerëz që i dalin zot në çdo kohë”, shkroi Ramush Haradinaj.