Basha: Padia e Ramës ndaj Haradinajt, perversitet antikombëtar

Kryetari i Partisë Demokratike, Lulzim Basha, ka reaguar shumë ashpër në lidhje me akuzën e Kryeministrit Rama ndaj Kryeministrit në detyrë të Kosovës, Ramush Haradinaj. Përmes një reagimi në rrjetet sociale, Basha nuk i kursen akuzat ndaj Kryeministrit Rama, duke e cilësuar padinë e tij ndaj Haradinajt si një “perversitet të shëmtuar antikombëtar”. Për liderin e demokratëve, një padi e tillë është turp i madh që nuk mund të kalohet lehtë, pasi nuk shkon vetëm kundër Hardinajt, por edhe ndaj familjes së tij që ka dhënë kontribute të çmuara në çështjen kombëtare. Duke e cilësuar Ramën si Kryeministrin më të dështuar të Ballkanit, Basha shton më tej se padia e Ramës ndaj Haradinjat është një turp për të larguar vëmendjen nga problemet e qeverisjes. “* Pseudopadia e Edi Ramës ndaj Kryeministrit të Kosovës është një perversitet i shëmtuar antikombëtar. Është turp i pakapërdishëm që Ramush Haradinaj, pas gjakut të tij dhe familjes së tij për çlirimin e Kosovës, pas betejave me akuzat e montuara të Beogradit, të përballet me pasojat e degjenerimit dhe vasalitetit të Edi Ramës. Ky akt i ulët që na turpëron të gjithëve, meriton refuzimin dhe revoltën legjitime ndaj një Kryeministri të dështuar fund e krye dhe ndaj falimentimit të tij politik dhe moral para Shqipërisë dhe mbarë kombit shqiptar”, shkroi Basha në “Facebook”. Sakaq, deklarime në mbrojtje të Haradinajt në lidhje me këtë çështje kanë bërë edhe të tjerë personazhe të opozitës. Petrit Vasili e cilëson Ramën bashkë me Vuçiçin në sulmin që ka nisur kundër Haradinjat. Sipas tij, ky sulm ndaj Kryeministrit të Kosovës në detyrë nuk do të ketë sukses. “Tradhtia: Ndërsa përkujtohet Reçaku, Rama padit Haradinajn! Edi Rama, Kryeministri i shtetit amë, Shqipërisë, tradhtisht dhe pabesisht padit luftëtarin Ramush Haradinaj. Vuçiç nuk e njeh Reçakun dhe Rama, ndërsa përkujtohet Reçaku, padit Haradinajn që ka derdhur gjak për Kosovën. Rama dhe Vuçiç, dy pjesë të së njëjtës gjëje. Turp historik, damkë tradhtie, që do ta shoqërojë gjithë jetën, kjo është për Edi Ramën padia, që vetëm i merr të keqen Ramushit”, shkruan Petrit Vasili.