Vidhnin zyra e pajisje elektronike, arrestohen dy të rinj
TIRANE – Shërbimet e Komisariatit nr. 6, në bashkëpunim me Sektorin e Krimeve të Rënda në Policinë e Tiranës, finalizuan dje operacionin e koduar “Mbikalimi”, pas një pune operative disamujore për parandalimin dhe zbardhjen e disa vjedhjeve. Në vijim të gjurmimit për identifikimin e autorëve të disa vjedhjeve të kryera në harkun kohor të 7 muajve të fundit, rreth orës 03: 30, në rrugën “Sokrat Miho”, t pallatet “Fratari”, kanë konstatuar një djalë, në tentativë për të vjedhur në një automjet tip “Benz”, në pronësi të shtetasit M. K. Shërbimet e Policisë kanë ndërhyrë duke i bërë thirrje të riut për të ndaluar, por 19- vjeçari është larguar me shpejtësi me një automjet “BMW”. Policia i është vënë në ndjekje duke bërë të mundur bllokimin e mjetit bashkë me personin e dyshuar për vjedhje. Nga verifikimet e momentit rezultoi se mjeti drejtohej nga shtetasi E. M., 19 vjeç, banues në Kamzë, Tiranë, ndërsa automjeti me të cilin ai qarkullonte ishte vjedhur në Elbasan dhe targat ishin vjedhur në Durrës. Ai u arrestua në flagrancë dhe rezultoi i dyshuar edhe për 7 vjedhje të tjera të subjekteve të ndryshme tregtare dhe zyrave. Nga ana tjetër, shërbimet e Komisariatit nr. 1 finalizuan operacionin e koduar “Lenovo”, gjatë të cilit u arrestua një 34- vjeçar me inicialet E. C., si autor i dyshuar i tri rasteve të vjedhjes së pajisjeve elektronike në dyqane të ndryshme të kryeqytetit. Nga verifikimet e kryera nga kamerat e sigurisë, ai rezultoi të ketë vjedhur 3 laptopë, në dyqane të ndryshme.