Vlerësimi i nxënësve, vajzat ua kalojnë djemve
Shahini: Rezultatet, falë reformave të fundit në arsim
Njohuritë e një vajzë 15vjeçare me një djalë në të njëjtën moshë kanë plot dy vite diferencë. Kjo është një ndër gjetjet interesante të raportit të PISA 2018 për Shqipërinë, për të cilën Ministria e Arsimit organizoi dje një diskutim. Edhe pse pozicioni aktual në krahasim me vlerësimin ndërkombëtar të 2015- ës nuk shënon përmirësim të dukshëm ( vendi i 61- të nga 79 vende pjesëmarrëse në PISA 2018, vendi i 51- të nga 70 vende në PISA 2015), të dhënat e interpretuara nga ministria për secilën nga tri disiplinat janë premtuese. Matematika është lënda ku të rinjtë shqiptarë kanë dhënë maksimumin e tyre, duke marrë 437 pikë, duke u renditur ndër shtetet që kanë shënuar progresin më të madh në raport me vlerësimin e mëparshëm. Ndërsa në lexim e shkenca, të rinjtë kanë marrë përkatësisht 405 pikë dhe 417 pikë, 20 pikë më shumë se më herët. Për ministren e Arsimit, Besa Shahini, këto të dhënat janë fryt i reformave të ndërmarra vitet e fundit. “Nuk jemi aty ku duam, por kapërcimet që po bëjmë çdo tri vjet janë të vlefshme për t’u cekur. Dallimi në rezultat midis nxënësve vetëm 8% u përket dallimeve socio- ekonomike, ndërsa dallimi mes vajzave dhe djemve shkon në favor të atyre të parave me rreth 2 vite shkollimi”, tha Shahini duke nënvizuar edhe dy shqetësimet kryesore, për të cilat pret zgjidhje. “Dallimi i rezultateve mes nxënësve të shkollave rurale dhe atyre urbane është goxha i madh. Ne e dimë pak a shumë pse ndodh kjo. Kemi ende 23 mijë nxënës që shkojnë në shkollë në klasa kolektive, ku nxënësit e gjeneratave të ndryshme bëjnë bashkë mësim jocilësor, sidomos me mësues që nuk janë të trajnuar për të bërë mësim në klasa kolektive. Kemi arritur me shumë sforco që të ulim numrin e tyre duke i kaluar në sholla më të mëdha, por sërish kemi një numër të madh. Shqetësimi im i dytë është se kemi hasur një rënie në rezultat në shkenca 3- vjeçarin e fundit. Kur futëm librat e rinj kemi pasur një rezistencë nga mësuesit, që të zbatojnë siç duhet kurrikulën e re në klasë.
Kemi një hendek në ndërlidhjen mes përgatitjes së mësuesit në universitet dhe aplikimit të njohurive në klasë. Kjo duhet të tejkalohet”. Krahasuar me vendet e tjera, Turqia, Mali i Zi e Brazili janë ngjitur disa pozicione më lart, ndërsa Shqipëria sot lë pas Bosnjë- Hercegovinën, Argjentinën e Perunë. Në treshen më të dobët vijojnë të jenë Kosova me Republikën Dominikane si dhe Filipinet, që janë futur rishtazi në këtë vlerësim.