NE TIRANE E RRETHE
Legalizimet, lista me 760 familjet që marrin tapinë
Zbardhet vendimi i Qeverisë për legalizimin e shtëpive. Emrat e 760 familjeve që marrin tapinë në Tiranë e çdo qytet dhe pronarët që kompensohen
Agjencia e Kadastrës ka publikuar dje emrat e familjeve që marrin pronësinë mbi truallin, në të cilin kanë ndërtuar pa leje.
Janë 760 familje, për të cilat është miratuar kalimi i pronësisë me vendim qeverie. Bashkëlidhur kësaj liste janë edhe emrat e pronarëve të shpronësuar për efekt të procesit legalizues, të cilët marrin paratë e kompensimit. KALIMI I PRONËSISË "Këshilli i Ministrave vendosi miratimin e kalimit të së drejtës së pronësisë në favor të subjekteve përfituese, për 618 parcela ndërtimore të objekteve të legalizuara dhe kompensimin financiar të pronarëve të pasurive të paluajtshme që preken prej tyre", thuhet në vendimin e miratuar në mbledhjen e së mërkurës. Përfituesit janë të shpërndarë në disa qarqe të vendit, përkatësisht: Tiranë, Berat, Elbasan, Durrës, Gjirokastër,
Vlorë, Fier, Lezhë, Kukës, Korçë dhe Shkodër. Vendimi për kalimin e pronësisë u hap rrugë procedurave të regjistrimit dhe pajisjes me certifikatën e pronësisë së këtyre familjeve. FONDI PËR PRONARËT
Ligji përcakton që 50 për qind e të ardhurave që arkëtohen nga procesi legalizues të shkojnë për kompensimin e pronarëve. Fondi që do të ndahet për familjet që kanë emrin në listë kap vlerën e rreth 2 milionë dollarëve. "Për kompensimin e pronarëve përdoren po ato të ardhura që arkëtohen nga drejtoritë vendore të Agjencisë Shtetërore të Kadastrës, si rrjedhojë e kalimit të pronësisë nëpërmjet shitjes së parcelës ndërtimore, si për pasuritë shtetërore, edhe për pasuritë e të tretëve, në favor të objekteve informale që legalizohen. Sipërfaqja e përgjithshme që kompensohet është 26 416,1 m ² dhe vlera e përgjithshme e kompensimit financiar është 229 260 847,34 lekë". Për rastet me mbivendosje, vendimi përcakton që vlera e kompensimit të ndahet nga
ATP në momentin që vendos Gjykata, pra kur zgjidhet mosmarrëveshja. "Kur për truallin e parcelës ndërtimore ka mbivendosje të disa titujve pronësie, Vendimi i Këshillit të Ministrave për masën dhe vlerën e kompensimit financiar miratohet pa përcaktuar subjektin përfitues të shumës. Me miratimin e këtij vendimi, ASHKja kryen regjistrimin e pronësisë mbi parcelën ndërtimore në favor të poseduesit të ndërtimit të legalizuar. Vlera e kompensimit financiar vendoset në një llogari bankare të posaçme dhe vihet në dispozicion të subjektit, që do të rezultojë përfitues 15 ditë nga vendimi gjyqësor i formës së prerë", specifikohet në ligj.