Video me kokainë, SPAK merr në pyetje bashkiakun e PS, e heton për drogë
“Inkurajoj SPAK që të zbardhë një orë e më parë të vërtetën”
Deputeti socialist, njëherësh kryetar i Komisionit të Ligjeve, Ulsi Manja, ishte i pari që reagoi në emër të Partisë Socialiste për videon e kryebashkiakut të Bulqizës, Lefter Alla, i cili shfaqet duke thithur kokainë.
Manja deklaroi se Partia Socialiste nuk bëhet mburojë e asnjë personi publik, qoftë i zgjedhur në pushtet vendor apo qendror nëse bie ndesh me ligjin. I ftuar në rubrikën “Opinion”, në “Neës24”, Ulsi Manja tha se SPAK duhet të zbardhë një orë e më parë të vërtetën mbi kryebashkiakun Alla, ndërsa theksoi se ai duhet të pezullohet nga detyra derisa drejtësia të nxjerrë konkluzionet për rastin. “Më lejoni të ndaj përgjegjësinë politike të PS me përgjegjësinë e institucioneve shtetërore dhe atë individuale të personave. Partia Socialiste e ka bërë të qartë se nuk bëhet mburojë për asnjë person publik, qoftë i zgjedhur në nivel vendor apo qendror, nëse bie ndesh me ligjin. Këtë demonstrim të vullnetit të saj politik, PS e ka shprehur me votë, por edhe me qëndrime publike, që kur votuam ligjin për dekriminalizimin dhe Reformën e Drejtësisë, por edhe me qëndrimin që ka mbajtur me disa të zgjedhur lokalë, për të cilët ka pasur denoncime publike. Edhe në rastin konkret, PS është e qartë”, u shpreh dje Manja.
REAGIMI
Sipas kryetarit të Komisionit të Ligjeve, në një kohë që ende nuk janë shprehur organet ligjzbatuese, askujt nuk mund t’i bëhet një gjyq publik. Ulsi Manja përgëzoi SPAK për fillimin e hetimeve dhe reagimin e shpejtë që pati pas publikimit të videos, duke e inkurajuar që ngjarja të zbardhet sa më shpejt. “Sa i përket përgjegjësisë së institucioneve shtetërore, askujt nuk mund t’i bëhet një gjyq publik, pa u shprehur agjencitë ligjzatuese. Pra, do duhet që Prokuroria të shprehet për rastin. Nëse prokuroria do dalë në konkluzionin se videoja është rast konkret, institucionet shtetërore duhet të marrin masa. Në rast se ky person jep dorëheqjen sot dhe nesër organet e drejtësisë thonë se videoja ishte shantazh? Ai nuk mund të rikthehet në detyrë. Mendoj se për rastin konkret SPAK ka filluar hetimin dhe e përgëzoj që ka reaguar shpejt dhe e inkurajoj ta zbardhë një orë e më parë, që të mbyllet debati. Nëse kryebashkiaku është në konflikt me ligjin, është në përgjegjësinë e qeverisë të ndërmarrë të gjitha masat për ta shkarkuar nga detyra. Por, duhet të dimë cila është e vërteta. Është rasti të flasë drejtësia. Për përgjegjësinë morale është në ngarkim të vetë kryetarit të bashkisë. Duhet të kemi një hetim të paanshëm, të shpejtë dhe objektiv dhe derisa të flasë drejtësia, kryebashkiaku mendoj se duhet të jetë i pezulluar. Por, nuk mendoj për shkarkim pa folur drejtësia”, tha Manja.
ZV. MINISTRJA E BRENDSHME
Mbrëmjen e së mërkurës, zv. ministrja e Brendshme, Rovena Voda, në studion e “Byro Politike” në “Abc Neës”, ka komentuar videon e publikuar nga gazetari Artan Hoxha, ku shihet kryebashkiaku i Bulqizës, Lefter Alla duke konsumuar lëndë narkotike. Sipas zv. ministres, fillimisht duhet të vërtetohet nëse videoja është e vërtetë dhe nëse më pas rezulton e tillë, do të veprojnë agjencitë ligjzbatuese. “Më lejoni, ju thatë që nga Policia është arrestuar djali i tij. Do të thotë që sot kemi një Polici që nuk ka frikë nga politika. Për sa i përket rastit, vlen të analizohet kjo video, është i zgjedhur, ka bërë një formular. Unë besoj që agjencitë ligjzbatuese në vend do të merrem me këtë rast. Unë nuk kam dijeni konkrete, për herë të parë po e shikoj këtu. Por jam më se e bindur se agjencitë ligjzbatuese do të marrin hapat e tyre. Konsumimi i lëndëve narkotike nuk është vepër penale, por duhet të veprohet dhe sigurisht është komplet tjetër gjë, sepse është i zgjedhur vendor. Duhet parë nëse video është e vërtetë. Historitë me video tregojnë që kanë një frymë të keqe te ne. Sipas meje duhet parë nëse video është e vërtetë, dhe nëse po, agjencitë ligjzbatuese do të veprojnë dhe ne do të shohim hapat që ato do të ndërmarrin”, tha ajo.