“Rama ka përgjegjësinë ligjore që ta shkarkojë”
Gazment Bardhi: Heshtja tregon arsyet e përzgjedhjes së tij
Sekretari i Përgjithshëm i PD- së, Gazment Bardhi, ka reaguar pasi Lefter Alla deklaroi se do të padisë një nga anëtarët e partisë së tij, pikërisht Ervin Salianjin. Bardhi thotë se reagimi i Lefter Allës është hilacak dhe qesharak dhe thotë se nuk e ndihmojnë dot halucinacionet nga kokaina. Po ashtu, Bardhi thotë se heshtja e Ramës tregon qartë se përzgjedhja e Lefter Allës është bërë për shkak të përdorimit të kokainës dhe lidhjes së tij me grupe kriminale. Në deklaratën e tij, Lefter Alla shprehej se ishte nisur drejt Tiranës për të paditur ish- deputetin e PD- së, Ervin Salianjin, i cili, në një deklaratë nga selia, denoncoi kryebashkiakun e Bulqizës. Alla pretendon se videoja ku ai shfaqet duke pirë kokainë, është montazh nga PD në bashkëpunim me një televizion lokal në Bulqizë dhe thotë se për këtë ka qenë në dijeni rreth 1 vit më parë ( do të thotë para se të bëhej kryebashkiak). “Është qesharak dhe hilacak reagimi i Lefter Allës për të paditur Partinë Demokratike pse media publikoi videon, ku ai provohet si përdorues i kokainës. Halucinacionet nga përdorimi i kokainës apo mbrojtja nga shkarkimi prej Edi Ramës nuk e ndihmojnë dot”, thotë Bardhi në reagimin e tij. Ndërsa shton se Kryeministri Rama ka detyrimin ligjor, por edhe përgjegjësinë politike, që ta shkarkojë menjëherë nga detyra Lefter Allën. “Edi Rama ka detyrimin ligjor dhe përgjegjësinë politike ta shkarkojë menjëherë nga detyra Mr. kokainën e Bulqizës. Edi Rama e di se një përdorues kokaine ka njohje dhe lidhje me grupet kriminale të shpërndarjes së saj. Heshtja dhe mosveprimi i Edi Ramës është një tjetër dëshmi që përzgjedhja e Lefter Allës është bërë për shkak të cilësisë së tij si përdorues kokaine dhe të lidhjeve të tij me grupet kriminale të shpërndarjes dhe shitjes së kokainës”, u shpreh Gazment Bardhi. Sipas tij, fshehja pas përgjegjësisë individuale të Lefter Allës, Valdrin Pjetrit, Agim Kajmakut, Mark Babanit, Qerim Ismailajt apo Agron Malajt, janë pjesë e strategjisë së Edi Ramës për të vazhduar bashkëqeverisjen me krimin. “Këta i ka përzgjedhur dhe emëruar Edi Rama. Ky është modeli dhe ekipi qeverisës që Edi Rama u ofron shqiptarëve! Pa largimin e Edi Ramës, nuk mund të ketë ndarje të politikës nga krimi!”, deklaron sekretari i përgjithshëm i PD- së.