Rama sulmon politikën e Prishtinës: Servilë e me dyfytyrësi
Nga Berlini, ku u takua me Kancelaren gjermane, Kryeministri Edi Rama ka sulmuar sërish Kryeministrin në detyrë të Kosovës, Ramush Haradinaj. Në një intervistë për “Top Channel”, kreu i qeverisë shqiptare tha se ndihet i dëshpëruar me politikën e ndjekur nga Kryeministri në detyrë. Teksa u ndal te marrëveshja e fundit mes Prishtinës dhe Beogradit për linjën ajrore dhe për të vijuar më pas me linjën hekurudhore, Rama e akuzoi Haradinajn se serviloset karshi Amerikës dhe bën politikë provinciale ndaj tij. “Është për të ardhur keq, madje për të qenë të dëshpëruar me këtë dyfytyrësi, që nga një anë shfaq buzëqeshjen të zgjatur servile dhe nga ana tjetër shfaq dhëmbët kërcënues të një politike provinciale, që për disa vota dhe për një popullaritet të përkohshëm është gati të hedhë baltë dhe të krijojë hendek me vendin si motër, si vëlla, pjesë e të njëjtit komb”, tha Kryeministri. I pyetur nëse kishte marrë mbështetjen e Kancelares gjermane për Mini- Shengenin Ballkanik, Kryeministri Rama tha se kjo është një nga idetë e preferuara të Kancelares gjermane. Ndërkohë akuzoi politikën e Kosovës, se me qëndrimet që ka mbajtur për këtë çështje ka dëmtuar reputacionin e saj përballë partnerëve të mëdhenj. “Ajo e kupton shumë mirë dhe e di shumë mirë se çfarë hapi i jashtëzakonshëm është bërë në raport me Serbinë, duke e bindur atë që të heqë dorë nga vetoja ose nga refuzimi për të lejuar dhe lëvizjen e lirë të njerëzve, që do të thotë: Lëvizja e lirë e njerëzve mes Shqipërisë dhe Kosovës. Gjë që për fat të keq, në Prishtinë nuk duan ta kuptojnë dhe kujtojnë se duke e kthyer këtë në një debat se kush është tradhtari dhe kush është patrioti, po i bëjnë ndonjë nder apo të mirë Kosovës. Jo, e vërteta është që po e dëmtojnë Kosovën, po e largojnë atë nga miqtë dhe partnerët e mëdhenj të saj dhe po ia ulin në mënyrë krejt të padrejtë reputacionin e madh që Kosova fitoi pas marrjes së të drejtës për të qenë një shtet i lirë dhe sovran”, deklaroi Rama. Ndërkohë, shefi i ekzekutivit tha se procesi i Mini- Shengenit gëzon mbështetjen e Europës.