Negociatat, Meta poston foton e Ramës me Merkelin
Presidenti Ilir Meta ka përshëndetur angazhimin e Kancelares gjermane, Angela Merkel, për procesin e anëtarësimit të Shqipërisë në Bashkimin Europian, por ajo që bie më shumë në sy është fakti se kreu i shtetit ka publikuar foto të Kryeministrit Edi Rama. Kreu i shtetit ka zgjedhur për postimin e tij foton e shtrëngimit të duarve mes Kancelares Merkel dhe Kryeministrit Rama gjatë vizitës së tij zyrtare në Berlin, që i paraprin Konferencës së Donatorëve më 17 shkurt, në Bruksel, për rindërtimin e Shqipërisë pas tërmetit. “Përshëndes angazhimin e përsëritur të Kancelares Angela Merkel për çeljen e negociatave të anëtarësimit ndërmjet Shqipërisë dhe Bashkimit Europian. Zbatimi i 9 kushteve të Bundestagut me rezultate të prekshme dhe të qëndrueshme, janë harta më e sigurt e rrugës europiane të Shqipërisë!”, shkruan Presidenti Meta. Pak ditë më parë, në një intervistë për gazetën “The Times of Israel”, kreu i shtetit u shpreh besimplotë se negociatat me BE- në do të hapen shumë shpejt, bazuar dhe në takimin që ka pasur në Paris me Presidentin francez Emannuel Macron. “Ne jemi shumë të vendosur për t’u anëtarësuar në BE. Është e vërtetë që Presidenti Macron ka kërkuar të rishikojë metodologjinë e zgjerimit të BE- së dhe shpresojmë që kjo metodologji të rishqyrtohet shumë shpejt. Unë fola me të nëntorin e kaluar, kur isha në Paris. Ne jemi në kontakt me BE- në dhe shpresojmë që së shpejti do t’u hapë rrugë vendimeve pozitive për Shqipërinë dhe Maqedoninë e Veriut”, është shprehur Presidenti për gazetën izraelite.