Raportimi në Komision, Bushati kritika për Ministrinë e Jashtme
Në punimet e Komisionit të Politikës së Jashtme dje, ishministri Ditmir Bushati ka bërë një kritikë ndaj ish- vartësve të tij në këtë dikaster dhe pasardhësit, Cakaj. Përgjatë diskutimit për një projektligj për ngritjen e qendrave kulturore dhe informative në Shqipëri dhe Maqedoninë e Veriut, Ditmir Bushati ka ngritur si shqetësim mungesën e një përfaqësuesi nga Ministria e Jashtme për të raportuar në lidhje me temën, që sipas tij është dikasteri i përfshirë më shumë dhe drejtpërdrejt. Bushati kërkoi nga sekretarja e përgjithshme e Ministrisë së Kulturës, Entela Çipa, nëse shqiptarët në Maqedoninë e Veriut konsiderohen si minoritet apo si një nga 2 popujt shtetformues, pasi sipas tij në këtë pikë kemi të bëjmë me një nga temat themelore të politikës së jashtme të Shqipërisë. Çipa nuk i ktheu përgjigje, duke theksuar se do duhej të ishte një përfaqësues nga Ministria e Jashtme për t'iu përgjigjur një pyetje të tillë. "Unë kam një pyetje, por duke ditur që këtu nuk ka asnjë përfaqësues të Ministrisë së Jashtme, sepse për mua gjeneza e këtij dokumenti që keni sjellë këtu është politike. Si i konsideroni shqiptarët në Maqedoninë e Veriut, si minoritet apo si një nga dy popullsitë shtetformuese? Kjo është pyetja ime e parë dhe nga këtu, ne më pas mund të vazhdojmë. Në rast se ky drejtori do të jetë brenda ambasadës, unë mendoj se nuk ka fare nevojë për këtë gjë, sepse ne kemi ligjin për shërbimin e jashtëm ku përcaktohet edhe për mënyrën sesi veprohet me Ministrinë e Mbrojtjes për atashetë ushtarakë dhe me Policinë e Shtetit. Dua të ma ndani këtë gjë, pasi për mua është një çështje shumë e mprehtë e politikës se jashtme dhe e vijës së Shqipërisë me fqinjin që e kemi mik dhe që quhet Maqedoni e Veriut", tha Bushati. Ndërkohë, edhe kryetarja e Komisionit të Politikës së Jashtme, Mimi Kodheli, i tërhoqi vëmendjen Ministrisë së Jashtme, duke i kërkuar dokumentacionin përkatës para se ky projektligj të kalojë për miratim në seancë plenare.