Gjykata e Tiranës dënon me burg turkun "gylenist"
Simsek u kap me vizë të falsifikuar, të siguruar në Kosovë
Gjykata e Tiranës dënoi me 1 vit burg turkun Selami Simsek, i cili u arrestua në Rinas me vizë false.
Simsek u ndalua së bashku me Harun Çelik, i cili u ekstradua disa javë më parë në një procedurë të dyshimtë; të dy konsiderohen në Turqi si "gylenist". Në seancën e djeshme, Prokuroria e Tiranës kërkoi për Simsek dënimin me 1 vit e 6 muaj burg, ndërsa ai përfitoi nga gjykimi i shkurtuar, duke u dënuar përfundimisht me 1 vit. Avokati i turkut kërkoi dënimin e tij me periudhën e paraburgimit dhe lirimin e menjëhershëm, ose shlyerjen e dënimit në shërbim prove. "Nuk jemi dakord me masën e dënimit. Nuk ka rrethana rënduese për klientin tim. Ai ka rreth 6 muaj në burg dhe ka reflektuar, duke treguar çdo gjë. Ai është baba i dy fëmijëve të mitur. Ne kërkojmë dënimin e tij me masën e paraburgimit dhe lirimin e tij të menjëhershëm. Nëse Gjykata nuk bindet për këtë kërkesë, kërkojmë shlyerjen në shërbim prove", tha avokati. Asnjë nga kërkesat e mbrojtjes nuk u pranua nga Gjykata.
PROKURORIA
Sipas Prokurorisë, itinerari i Simsek ishte RinasVjenë- Toronto. Nga verifikimet ka rezultuar se pasaporta e tij turke ishte e rregullt, por viza me të cilën kërkonte të shkonte në Kanada, ishte e falsifikuar. Prokuroria tha se në deklarimet e dhëna prej tij, ai ka pohuar se viza është marrë në Prishtinë. Ai ka paguar 5 mijë euro për këtë dokument përmes një të afërmi te një person që nuk e njeh.
Ashtu si Çelik, edhe Selami Simsek dyshohet se konsiderohet nga autoritetet turke si anëtar i lëvizjes "Gyleniste" dhe nuk i dihet nëse do të ketë të njëjtin fat si bashkëkombësi i tij. Simsek u arrestua në Aeroportin e Rinasit në të njëjtën kohë që u arrestua dhe Harun Çelik.
Që të dy kishin ndjekur të njëjtin itinerar, ndërsa kishin qenë më parë në Prishtinë, ku kishin ndarë të njëjtën dhomë, në pritje të marrjes së një vize kanadeze, në këmbim të pagesës. Të dy kishin hyrë me pasaportën e tyre të rregullt në kufi dhe ishin zbuluar nga autoritetet shqiptare në përpjekje për të fluturuar drejt Kanadasë.
HARUN ÇELIK
Pasi mbaroi dënimin për akuzën e "Falsifikimit të dokumenteve", Harun Çelik, më 1 janar, është ekstraduar për në Turqi. Megjithëse Policia u shpreh se nuk ka pasur një kërkesë nga shtetasi turk për azil, procedura e ekstradimit të tij u konsiderua si e dyshimtë. Çelik u dënua me 13 muaj burg për "Përdorim të dokumenteve të falsifikuara" dhe në përfitim të gjykimit të shkurtuar, qëndroi 5 muaj e gjysmë në burgun 302, në Tiranë. Mediat turke raportuan se Harun Çelik u arrestua menjëherë sapo zbriti në aeroportin e Stambollit si një anëtar i FETO- s, inicialet me të cilat njihet në Turqi lëvizja Gylen. Mbi të rëndojnë tashmë akuzat e të qenit anëtar i një organizate terroriste, i financimit të terrorizmit dhe spiunazhit ndërkombëtar kundër shtetit turk - akuza të zakonshme këto për qindra mijëra persona në Turqi, të cilët konsiderohen nga qeveria e Erdogan si mbështetës të lëvizjes "Gylen".