Kurti dhe Mustafa dështojnë sërish, sot takohen me ambasadorët e Quint- it
Takimi i “shpresës” për shpalljen e koalicionit bashkëqeverisës mes Isa Mustafës dhe Albin Kurtit ka përfunduar pa marrëveshje. Të dyja palët kanë dalë nga takimi i mbajtur në ambientet e Kuvendit të Kosovës pas më shumë se dy orësh, duke mos dhënë asnjë deklaratë për mediat. Në fillim të takimit, nga Vetëvendosje deklaruan se posti i kryeparlamentarit do të vazhdojë të jetë i Glauk Konjufcës, siç u votua në Kuvend. Ndërsa numri dy i LDK- së, Agim Veliu, tha para takimit, se posti i kryeparlamentarit duhet t’i jepet LDK- së, nëse duan të ketë marrëveshje. Kryetari i LDK- së, Isa Mustafa, ka thënë para takimit se po shkojnë për të arritur marrëveshje. “Për ata po shkojmë, ne jemi të vullnetshëm ta përfundojmë marrëveshje dhe të procedojmë më tutje”, tha Mustafa. Por pas përfundimit të takimit, të dyja partitë i kanë shmangur mediat e pranishme. Isa Mustafa u raportua të jetë larguar më herët bashkë me anëtarët e tjerë të LDK- së, ndërsa Kurti ishte larguar disa minuta më vonë. Një orë pas mbylljes së takimit, Lëvizja Vetëvendosje konfirmoi mosarritjen e marrëveshjes. Ky subjekt ka njoftuar se takimin e radhës do ta mbajë të martën, ku të pranishëm do të jenë edhe ambasadorët e QUINT- it. “Nuk u arrit marrëveshja. Palët u pajtuan që nesër të zhvillohet një takim tjetër, bashkë edhe me ambasadorët e Quint- it në Prishtinë, si dhe me Shefen e Misionit të BE- së. Kanë mbetur edhe tetë ditë deri në skadimin e afatit kushtetues për koalicionin qeverisës”. Më pas, edhe Lidhja Demokratike e Kosovës ka konfirmuar mosarritjen e marrëveshjes. “Në takimin e sotëm, kemi shpalosur qëndrimet tona, tashmë të njohura dhe publike për opinionin. Konsiderojmë që këto qëndrime janë të balancuara për të dyja palët dhe që i shërbejnë stabilitetit të qeverisjes së vendit”, shkruhet në faqen e LDK- së në “Facebook”.