Bolton “tradhton” Trump, ja çfarë shkruan në librin e tij
Zbulimi i dorëshkrimit dëmton mbrojtjen e Presidentit
Një avokat për ishkëshilltarin e Sigurisë Kombëtare në SHBA, John Bolton, akuzoi zyrtarët e Shtëpisë së Bardhë për rrjedhje të detajeve të librit të ardhshëm të Bolton, pas një raporti që dorëshkrimi përmbante pretendimet se Trump e lidhi drejtpërdrejt ndihmën e sigurisë për Ukrainën me hetimin e rivalëve të tij politikë.
Avokati Charles Cooper tha për “Associated Press” se ai e dorëzoi dorëshkrimin e Bolton në Divizionin e Menaxhimit të Regjistrimeve të Këshillit të Sigurisë Kombëtare, për rishikimin e përmbajtjes së tij për informacion të klasifikuar më 30 dhjetor, një praktikë standarde për ish- zyrtarët qeveritarë që shkruajnë libra. Cooper tha se atij iu dha siguria që dorëshkrimi nuk do të shihej nga persona të tjerë përveç stafit. “Është e qartë, për fat të keq, nga artikulli i ‘ New York Times’ i botuar sot, se procesi i rishikimit të publikimit është korruptuar dhe informacioni është zbuluar nga persona të tjerë, përveç atyre të përfshirë në rishikimin e dorëshkrimit”, tha Cooper në një deklaratë. Por ai refuzoi të konfirmojë apo mohojë përmbajtjen e raportimit të “Times”. Gazeta raportoi të dielën në mbrëmje se Bolton ka shkruar në dorëshkrimin e tij mbi një takim të gushtit me Trump, në të cilin Presidenti tha se ai dëshironte të vazhdonte ngrirjen e rreth 400 milionë dollarëve ndihmë të sigurisë për Ukrainën, derisa qeveria atje të binte dakord për të hetuar ish- Presidentin Joe Biden dhe demokratët e tjerë. Zbulimi ndërlikon gjykimin e fajësimit të Trump në Senat, ku senatorët janë të ndarë nëse duhet të thërrasin dëshmitarë si Bolton ose të bëjnë drejtpërdrejt një votim për të liruar ose dënuar Presidentin mbi akuzat për abuzim me pushtetin dhe pengim të Kongresit. Presidenti Trump ka reaguar personalisht ndaj publikimit të lajmit mbi dorëshkrimin në “NYT”, duke e quajtur atë fals. “Nuk i kam thënë KURRË John Bolton- it se ndihma për Ukrainën ishte e lidhur me hetimet për demokratët, përfshirë Bidenët. Në fakt, ai nuk është ankuar kurrë për këtë në kohën e shkarkimit të tij shumë publik. Nëse John Bolton e ka thënë këtë, ka qenë vetëm për të shitur një libër. Dhe transkriptet e thirrjeve të mia me Presidentin Zelensky janë e gjithë prova që nevojitet, përveç faktit që Presidenti Zelensky dhe ministri i Jashtëm i Ukrainës thanë se nuk ka pasur asnjë presion dhe asnjë problem. Për më tepër, unë u takova me Presidentin Zelensky në Kombet e Bashkuara ( Demokratët thanë se nuk jam takuar me të) dhe lirova ndihmën ushtarake për Ukrainën pa ndonjë kusht apo hetime e vazhduam sipas planifikimit. Unë gjithashtu e lejova Ukrainën për të marrë raketat antitank ‘ Javelin’. Administrata jonë ka bërë shumë më tepër se administrata e mëparshme”, ishte mesazhi i tij në “Twitter”.
Ekipi ligjor i Presidentit rifilloi ditën e dytë të argumenteve të hënën pasdite. Dy republikanë kryesorë të moderuar thanë se lajmet e
Bolton forcuan çështjen për thirrjen e dëshmitarëve në gjykim. Senatori republikan Mitt Romney parashikoi se ishte gjithnjë e më shumë e mundshme që republikanët e tjerë tani do t’i bashkoheshin atij në thirrjen që Bolton të dëshmonte. Por senatorë të tjerë republikanë, përfshirë udhëheqësin republikan në Senat, e minimizuan ose refuzuan këtë opsion.