Juventus, mbrojtja s'ka më garanci por... fut ujë
Ku ka humbur mbrojtja solide e Juventusit? Një pyetje e vështirë dhe një mister, për të cilin Mauricio Sarri duhet të përgjigjet shumë shpejt. Një humbje si ajo në Napoli nuk hap krizën e skuadrës kryesuese me ritme rekord, por tregon se në ingranazhin bardhezi të studiuar nga trajneri i ri, diçka nuk funksionon. Sidomos në fazën mbrojtëse, e cila ka qenë pika më e fortë e dominimit në vitet e fundit. Për momentin, ajo është shndërruar në një pikë të dobët dhe Bonuçi me shokë nuk po reagojnë prej disa javësh. Në 9 javët e fundit të Serisë A, "Zonja" e ka mbajtur portën të paprekur vetëm një herë. Dy golat e pësuar në "San Paolo" kundër Napolit, të organizuar nga Gatuzo, janë përsëritjet e kambanës së alarmit që prej kohësh ka nisur të bjerë në "Continasa". Sigurisht që lidhet edhe me dëmtimet e dy "luftëtarëve" si Kielini dhe Demiral. Në fakt, nuk mungojnë vetëm lojtarët, por edhe mënyra si mbrohet, lë për të dëshiruar. Trajneri nuk e ka fshehur pas Napolit zhgënjimin nga të tijtë. "Na mungon diçka në mentalitetin e fazës mbrojtëse.
Duhet të jemi më agresivë, sepse ndonjëherë japim idenë që jemi shumë pasivë në limitet e zonës sonë. Duhet të përmirësohemi", tha trajneri.
Pak agresivë - Dyshja Bonuçi- De Ligt është përmirësuar ndjeshëm në të gjitha aspektet, por vazhdon ende të mos bindë dhe kjo nuk është rastësi. Fillimi i vështirë i De Ligtit me fanellën bardhezi ka krijuar këto probleme. Sarri do të ishte mbështetur shumë te agresiviteti i Kielinit dhe Demiralit. Në Napoli, Shezni gaboi me atë pritje, por mbrojtësit duhet të ishin të përgatitur dhe të mos e humbnin aq lehtësisht Zielinskin, po ashtu si Insinjen në momentin e golit të dytë.
Mesfusha - Problemet e Juventusit nuk janë vetëm në mbrojtje, por edhe në mesfushë. Jo në sasi, por edhe në cilësi. Edhe aty duket sikur bardhezinjtë po vuajnë. Rabio vazhdon të ketë probleme për t'u futur në mekanizmat e Sarrit, Emre Xhan është në dalje. Bernardeski gjithashtu është drejt largimit dhe pritet një mesfushor në merkato. Koha po kalon dhe Sarri kërkon lojtarë agresivë për Juventusin e tij.