Ambasadoja e re e SHBA me Kryeprokurorin: Nxitje për një sistem të pavarur
“Prokurorët t’i përqasen punës me mendësinë e shërbimit publik”
Teksa ofroi mbështetje për Reformën në Drejtësi, ambasadorja e re e Shteteve të Bashkuara të Amerikës, Yuri Kim, në takimin me Prokurorin e Përgjithshëm, Olsian Çelën, kërkoi që prokurorët t’i përqasen punës me mendësinë e shërbimit publik.
Kim shtoi se ata duhet të përmbushin premtimin për një gjyqësor të pavarur që do të japë drejtësi për të gjithë. “Gjatë takimit të tyre të parë sot, Ambasadorja e Shteteve të Bashkuara, Yuri Kim, e uroi Prokurorin e Përgjithshëm, Olsian Çela, për zgjedhjen e tij në detyrën e re së fundmi dhe premtoi ndihmë teknike të vazhdueshme nga Shtetet e Bashkuara, për të ndihmuar Shqipërinë në vijimin e zbatimit të Reformës në Drejtësi. Ambasadorja Kim nxiti prokurorët që, ndërsa përmbushin premtimin e një gjyqësori të pavarur me drejtësi për të gjithë, t’i përqasen punës me mendësinë e shërbimit publik, integritetit dhe mbrojtjes së të drejtave të njeriut”, njoftoi Ambasada Amerikane. PROKURORI I PËRGJITHSHËM Në lidhje me takimin zyrtar të zhvilluar në Prokurorinë e Përgjithshme, njoftoi edhe zyra e shtypit në këtë institucion. Sipas Prokurorisë, në takim u ndanë konsiderata për bashkëpunimin në kuadër të Reformës në Drejtësi. Kujtojmë se qeveria amerikane ka qenë një nga mbështetësit financiar dhe jo vetëm të reformës që po bëhet në sistemin e drejtësisë. “Prokurori i Përgjithshëm i Republikës së Shqipërisë, z. Olsian Çela, priti sot në një takim zyrtar znj. Yuri Kim, ambasadore e Ambasadës së Shteteve të Bashkuara të Amerikës. Në takim u ndanë konsiderata reciproke për bashkëpunimin mes dy vendeve, veçanërisht në fushën e drejtësisë dhe rolin e Shteteve të Bashkuara në procesin reformues në këtë fushë”, njoftoi Prokuroria e Përgjithshme.
MASAT Gjatë takimit, Kryeprokurori Olsian Çela i prezantoi ambasadores masat që Prokuroria e Përgjithshme planifikon të marrë në zbatimin e legjislacionit penal. Çela vlerësoi kontributin e SHBA- ve me programet që kanë dhënë asistenca në Shqipëri. “Fokus i veçantë gjatë këtij takimi iu dha jo vetëm ecurisë së Reformës në Drejtësi në përgjithësi, por dhe masave konkrete institucionale që Prokuroria e Përgjithshme planifikon të ndërmarrë me qëllim forcimin e zbatimit të legjislacionit penal në Shqipëri. Në këtë drejtim, Prokurori i Përgjithshëm, z. Çela, e vlerësoi mjaft të rëndësishme që për arritjen e objektivave të mësipërme, thelbësor është kontributi dhe ndihma e partnerëve tanë ndërkombëtarë, si Shtetet e Bashkuara të Amerikës dhe programeve të tyre të asistencën teknike me përvojë të gjatë e të suksesshme në Shqipëri”, shkruhet në njoftim.