Me burg përjetë për vrasje, kush janë 50 më të rrezikshmit në kërkim
Policia e Shtetit: Personat më të kërkuar në Shqipëri, objekt i punës së Njësisë së Kërkimit
Objekti i punës së njësisë më të re të Policisë së Shtetit, e njohur si Njësia e Kërkimit, do të jetë zbulimi i vendndodhjes dhe arrestimi i 50 personave më të kërkuar në Shqipëri, por edhe jashtë saj.
Policia e Shtetit publikoi dje fotografitë dhe të dhënat e 5 personave që konsiderohen si më të rrezikshmit, duke deklaruar se çdo ditë do publikojë të dhënat edhe për persona të tjerë. "Në kuadër të punës për kapjen e personave të shpallur në kërkim, nisur nga rrezikshmëria e theksuar e secilit prej personave, bazuar në veprën penale që ka kryer dhe në masën e dënimit të marrë nga gjykatat, duke filluar nga masa më e rëndë, burgim i përjetshëm dhe deri në 25 vjet burgim, është përcaktuar lista me 50 personat më të kërkuar, që do jenë objekt i punës së forcës së posaçme", tha Policia e Shtetit. Njësia e Kërkimit do të marrë gjithë masat e duhura për realizimin e kërkimit të këtyre personave dhe kapjen e tyre, duke bashkëpunuar me strukturat përkatëse në Drejtoritë Vendore të Policisë, si dhe me strukturat homologe të vendeve europiane që bëjnë pjesë në rrjetin ENFAST. "Policia e Shtetit është e vendosur për të kapur dhe çuar para drejtësisë të gjithë personat e kërkuar dhe në këtë kuadër kërkon edhe bashkëpunimin e qytetarëve që pas çdo publikimi të fotove të personave në kërkim, në rast se disponojnë informacion mbi vendndodhjen e tyre, të njoftojnë në ' Komisariatin Dixhital' apo numrin falas 112, duke u siguruar anonimat të plotë dhe reagim të menjëhershëm", tha Policia. PESE TE KERKUARIT Pesë personat më të kërkuar, emrat e të cilëve u publikuan dje nga Policia e Shtetit, janë të dënuar më burgim të përjetshëm me vendim të formës së prerë. I pari është Altin Arapi, pjesë e organizatës së quajtur "Hakmarrja për Drejtësi". Aktualisht 49 vjeç, vlonjati i dënuar me burgim të përjetshëm për vrasjen e shoferit të ish- kryeprokurorit Theodhori Sollakut, Genci Sina, dhe disa krime të tjera, vijon të kryesojë listën e më të kërkuarve të drejtësisë Shqiptare. Në emrat e publikuar dje nga Policia, ai ndiqet nga Dritan Syziu, gjithashtu i dënuar me burg përjetë, për vrasjen e një efektivi Policie e më pas me radhë edhe 3 të tjerë të dënuar me burgim të përjetshëm, Eduart Kurti, Gentian Take e Gëzim Memeti.
ALTIN ARAPI Altin Arapi, apo Petrit Berzati, 49 vjeç, është dënuar në mungesë me burgim të përjetshëm, për "Vrasje në rrethana cilësuese" dhe "Vjedhje me armë në bashkëpunim". Ai është person i shpallur në kërkim për llogari të Policisë së Tiranës. Përveç vrasjes së shoferit të ish- kryeprokurorit Theodhori Sollaku, ngjarje e ndodhur në bulevardin "Dëshmorët e Kombit", në Tiranë, Arapi, si pjesë e grupit "Hakmarrja për drejtësi", është akuzuar edhe për krime të tjera. Aktualisht, ai bashkë me kushërinjtë e tij, Laert dhe Orik Shyti, që po ashtu ishin pjesë e të njëjtit grup, ndodhen jashtë Shqipërisë. Ata akuzohen për vjedhje të bankave dhe arkave të shtetit, rrëmbim, vënia e një autobombe dhe vrasje. Ata janë dyshuar gjithashtu edhe për vendosjen e bombës te supermarketi i "VEFA- s" pranë 9katësheve. Gjykatat shqiptare i kanë dënuar shtetasit Altin Arapi dhe Orik Shyti me burgim të përjetshëm, në kuadër të dosjes "Hakmarrja për drejtësi". Dy vjet më parë, Gjykata Kushtetuese urdhëroi Gjykatën e Lartë të rishqyrtojë ankimin e të pandehurve, ankim i cili u pranua. Mësohet se "Hakmarrja për drejtësi" pas dy dekadave mbetet ende një proces gjyqësor pa vendim përfundimtar. Pas ankimimit në Gjykatën Kushtetuese të
Orik Shytit, një prej të dënuarve me burg përjetë, por që ende ndodhet në arrati, u rihap çështja, teksa kaloi në Gjykatën e Lartë. Avokati belg i Altin Arapit ka ankimuar në Strasburg vendimin e drejtësisë shqiptare, ku kërkohet korrigjimi dhe rishikimi i vendimit të dhënë.