Meta: Uniteti i delegatëve është një mesazh i fortë për sot
“Realizoi mbrojtjen e tërësisë territoriale të Shqipërisë”
Presidenti Meta vlerësoi dje “Kongresin e Lushnjës” me “Dekoratën e Flamurit Kombëtar”, me rastin e 100- vjetorit të kësaj ngjarjeje historike. Në fjalën e tij në këtë ceremoni, Presidenti Meta u shpreh se Kongresi i Lushnjës është një nga ngjarjet më domethënëse në historinë moderne të vendit. “Shqiptarët, edhe pse nuk i kishin kushtet dhe mundësitë teknike, arritën të sjellin në Kuvend bijtë e tyre më të devotshëm e më të përgjegjshëm dhe nëpërmjet tyre zërin e mbarë kombit. Uniteti rreth çështjes kombëtare, përgjegjësia, respekti, sjellja e qytetëruar dhe komunikimi midis delegatëve janë një mesazh i fortë për aktualitetin konfliktual të politikës sonë. Atdhetarët tanë kanë ditur të gjejnë gjuhën e përbashkët edhe kur kanë qenë prej krahinave, feve, ideve dhe partive të ndryshme, pasi ndryshe nga shumë popuj, nocioni i kombit, gjuhës dhe i identitetit etnokulturor te shqiptarët janë baza e bashkimit kombëtar”, u shpreh Presidenti. “Në vlerësim të kontributit dhe veprimtarisë së atdhetarëve të Kongresit të Lushnjës, si një nga kuvendet më të rëndësishme të historisë së kombit shqiptar, që realizoi mbrojtjen e tërësisë territoriale të Shqipërisë, rimëkëmbjen e shtetit shqiptar dhe konsolidimin e pavarësisë së plotë të vendit. Në kushte tejet të vështira, Kongresi i Lushnjës ia doli të bashkojë vendin e të jetësojë vetëqeverisjen, si dhe të garantojë sovranitetin e plotë të shtetit shqiptar para opinionit ndërkombëtar”, thuhet në motivacionin që shoqëron dekoratën e Presidentit Meta. Presidenti i Republikës dekoroi edhe familjen e Shaqir Fugës me Titullin “Kalorës i Urdhrit të Skënderbeut”, me motivacionin: “Për kontributin e saj në mikpritjen, zhvillimin dhe mbrojtjen e Kongresit të Lushnjës. Kjo familje, si një nga përfaqësueset më të mira të traditës atdhetare lushnjare, u hapi dyert e shtëpisë delegatëve dhe nuk kurseu asgjë për mbarëvajtjen e Kongresit në interes të kombit”. Gjithashtu, kreu i shtetit vlerësoi edhe Abdyl Ali Ypin ( pas vdekjes) me “Dekoratën e Artë të Shqiponjës”, me motivacionin: “Si atdhetar i shquar i lëvizjes për Pavarësi, kontribuues në shtetformimin dhe mbrojtjen e tërësisë territoriale të Shqipërisë, si dhe për përkushtimin e tij deri në flijimin e jetës për organizimin e Kongresit Kombëtar të Lushnjës”.