Indeksimi i pensioneve, zbardhet fondi për 2020
Qeveria miratoi planin për indeksimin e pensioneve. Gazeta zbardh dokumentin me shumën e parave që do ndahen d he kategoritë që do përfitojnë
Në tri vitet e ardhshme, fondi në adresë të pensionistëve do të njohë rritje.
Kjo jo pa shkak, duke qenë se edhe numri i pensionistëve që i shtohen skemës pritet gjithashtu të rritet. Në Fletoren Zyrtare është botuar dje vendimi "Për miratimin e kuadrit makroekonomik e fiskal për periudhën 20212023", në të cilin janë parashikuar fondet e çdo viti që do të shkojnë për rritjen e pensioneve deri në 2023.
FONDET
Këtë vit, për pensionistët janë adresuar 2.52 miliardë lekë ose rreth 25 milionë dollarë. Në këto kushte, shtesa do të variojë në kufijtë 2.5 për qind deri në 3 për qind mbi masën e pensionit. Sa i takon vitit që vjen, fondi në adresë të skemës së pensioneve do të rritet me rreth 1 milion dollarë, ndërkohë që një vit më vonë me 5 mijë dollarë, përkatësisht nga 2.62 miliardë lekë ose rreth 26 milionë dollarë, do të bëhet 3.12 miliardë lekë ose rreth 31 milionë dollarë. I njëjti fond do të jetë edhe për vitin 2023, ku po ashtu parashikohen rreth 31 milionë dollarë. Por e shprehur në përfitim të drejtpërdrejtë, një pensionist do të marrë mesatarisht 640 lekë më tepër këtë vit. Kështu, pensioni mesatar nga 14 160 lekë që është, pas indeksimit do të bëhet 14 800 lekë. Ndërkohë për vitin 2021, pensioni mesatar parashikohet të jetë 15 340, ndërsa për vitin 2022 rreth 15 900 lekë. Në fokus të çdo politike qeveritare është edhe shtimi i numrit të përfituesve. Parashikimet janë që deri në vitin 2022, numri i pensionistëve të shkojë në 684,086. Pra, skemës i shtohen edhe rreth 50 mijë pensionistë më tepër.
SKEMA
Skema e re e pensioneve që ka nisur të aplikohet prej janarit të 2015- ës, nuk parashikon rritje, por vetëm indeksim. Ligji i ri ndryshoi në thelb edhe mënyrën e llogaritjes së pensioneve, duke iu dhënë rëndësi kontributeve të derdhura ndër vite. Këtë vit, për të marrë atë që quhet pension maksimal, si burrat dhe gratë duhet të kenë 37 vite vjetërsi në punë. Ndërsa mosha e daljes në pension për burrat këtë vit është 65 vjeç dhe do të vazhdojë të jetë po kaq deri në vitin 2032. Ndërsa për gratë, nga viti 2015 mosha e daljes në pension rritet me dy muaj në vit, këtë vit është 61 vjeç. Me ndryshimet e bëra, formula e re përcakton një pension bazë dhe shtesën. Pensioni bazë është 7465 lekë, ndërsa shtesa bazuar në formulën e llogaritjes së pensionit është 1% për çdo vit sigurimi, shumëzuar me bazën mesatare të vlerësueshme, që personat e kanë arritur nëpërmjet kontributeve të paguara. Baza e vlerësueshme është paga e përfituar pas indeksimit me koeficientët korrespondues të çdo viti.