SPAK përgjysmon kandidatët për BKH, kush janë 18 pretendentët
Nga eksperienca në luftën ndaj korrupsionit dhe krimit të organizuar, te heqja dorë nga privatësia, çfarë plotësuan kandidatët e kualifikuar
Komisioni i ngritur për vlerësimin e kandidaturave për drejtues të Byrosë Kombëtare të Hetimit në SPAK skualifikoi 22 aplikantë, duke kaluar në fazën e dytë vetëm 18.
Këta të fundit duhet të kalojnë testet fizike, teste me shkrim dhe më pas do të përgjigjen para makinës së të vërtetës. Duke iu referuar njoftimit zyrtar të Strukturës së Posaçme Antikorrupsion( SPAK), 22 aplikantët e skualifikuar kishin mungesa në dokumentacion dhe disa nuk plotësonin kushtet e eksperiencës në punë, sa i takon luftës kundër korrupsionit dhe krimit të organizuar.
KRITERET E PLOTËSUARA
SPAK bëri të ditur këtë të hënë se 18 aplikantët që kaluan në fazën e dytë kanë plotësuar kriteret e kërkuara nga ligji për të qenë kandidatë për drejtues. Ata janë diplomuar për drejtësi ose kanë arsim të lartë policor. Kanë pasur të paktën 5 vite eksperiencë punë si prokurorë ose punonjës policie në luftën kundër korrupsionit dhe krimit të organizuar. Gjithashtu, të 18 kandidatët kanë firmosur deklaratë për dhënien e pëlqimit të tij dhe familjarëve të tij, që heqin dorë nga privatësia. Në kushtet kur kërkojnë të jenë pjesë e BKH- së, ata duhet të jenë dakord me kontrollin e llogarive dhe telekomunikimeve vetjake.
KANDIDATËT
Struktura e Posaçme kualifikoi drejtuesin e Shërbimit të Çështjeve të Brendshme dhe Ankesave në Policinë e Shtetit, Adriatik Ago, i cili ka një karrierë të gjatë në Polici. Ago kaloi në nëntor të vitit që lamë pas edhe vetingun, duke u konsideruar i përshtatshëm. Ago e ka përfunduar shkollën e Policisë në vitin 1981 dhe më pas, në vitin 1990 është diplomuar edhe si jurist. Agim Ismaili, aktualisht është në krye të Drejtorisë së Përgjithshme të Burgjeve, më herët ka qenë drejtor i Autoritetit Kombëtar të Ushqimit që prej tetorit të vitit 2017. Agim Ismaili është diplomuar për Drejtësi në Universitetin Kristal në vitet 2005- 2008, ndërsa më herët është diplomuar si inxhinier elektroteknik në vitet 1987- 1992 dhe si specialist i lartë i Policisë në vitet 1997- 2001. Në listën e të kualifikuarve është dhe numri dy i Policisë së Shtetit, Aida Veizaj. Kjo e fundit fillimisht ka qenë shefe e Sektorit për Hetimin e Pastrimit të Parave, në Drejtorinë për Hetimin e Krimit Ekonomik e Financiar. Më pas, në 2016 emërohet drejtore e përgjithshme për Kufirin dhe Migracionin. Një tjetër funksionar i Policisë, Ardian Çipa, është kualifikuar për më tej. Çipa ka qenë drejtor i përgjithshëm i Krimit të Organizuar dhe Hetimit të Krimeve të Rënda deri në 2017, kur u transferua për të drejtuar Drejtorinë e Mbrojtjes së Dëshmitarëve dhe Bashkëpunëtorëve të Drejtësisë. Artan Shkëmbi është një tjetër kandidat, aktualisht drejton njësinë e Task- Forcës në Policinë e Shtetit. I kualifikuar për drejtimin e Byrosë është edhe prokurori Ylli Pjetërnikaj, i cili e ka nisur detyrën e tij në vitin 2014 në Prokurorinë e Kukësit, ndërsa deri në vitin 2018 ka qenë prokuror në Prokurorinë e Tiranës. Një ndër kandidatët është dhe Eduard Merkaj, aktualisht drejtori i Kufirit. Kandidatë të tjerë të kualifikuar që janë pjesë të Policisë së Shtetit kanë shprehur interesin e tyre për të qenë në krye të BKH- së, si kryekomisarja Blerina Bajollari, ish- kreu i Policisë së Tiranës, Ervin Hodaj.