Alibeaj: Rama ta nisë anti- KÇK- në nga Edmond Bego
Reagon avokati i biznesmenit: Bego i pastër, u kontrollua tri herë
Ish- deputeti i Partisë Demokratike, Enkelejd Alibeaj, akuzoi dje Kryeministrin Rama se po bën propagandë me ligjin e njohur si anti- KÇK. Në një deklaratë për mediat, Alibeaj u shpreh i bindur se “Operacioni Forca e Ligjit” nuk ka për të goditur asnjë bandë kriminale, pasi sipas tij, kryeministri bashkëpunon me ta. Alibeaj përmendi rastin e biznesmenit Edmond Bego, që sipas tij, ndonëse ka qenë i dënuar në vitet që ka qeverisur Partia Socialiste, ka marrë 14 milionë euro tender. “Lufta kundër krimit të organizuar dhe pasurive të tij të paligjshme është emergjencë kombëtare, por kjo e Edi Ramës është vetëm propagandë dhe tallje me shqiptarët, në përpjekje për të mbuluar bashkëqeverisjen e tij me krimin. Nëse nuk do të ishte kështu, trafikanti ndërkombëtar i drogës, Edmond Bego, nuk do të kishte marrë nga qeveria e korruptuar e Edi Ramës tenderë, leje dhe licenca”, tha Alibeaj. Më tej, ai akuzoi kreun e qeverisë se ka futur krimin në politikë dhe në rastet kur nuk janë vetë personalisht kriminelët, kanë futur besnikët e tyre. “Në qeverinë e Edi Ramës, krimi u bë pjesë e politikës. Kriminelët u bënë deputetë, u bënë kryebashkiakë. Në rastet kur ata nuk hynë në politikë drejtpërsëdrejti, kriminelët krijuan lidhjet me pushtetin e Edi Ramës dhe u bënë biznesmenë të fuqishëm, duke marrë fonde publike nga tenderët korruptivë të qeverisë së tij”, vijoi Alibeaj. Por në një reagim për televizionin “Neës 24”, avokati i biznesmenit Bego, Ardian Leka, i ka mohuar akuzat e PD- së duke i cilësuar ato një flluskë sapuni. Leka ka shtuar se Prokuroria ka kontrolluar tri herë pasurinë e Edmond Begos dhe nuk ka zbuluar asnjë nga akuzat e selisë blu. “Është verifikuar pasuria dhe aktiviteti i Begos, tri herë, pas akuzave të PD- së. Si duket, PD- ja dhe përfaqësuesit e saj nuk kanë me çfarë të merren dhe godasin Begon. Në asnjë rast, Edmond Bego dhe shoqëria që ai përfaqëson nuk ka asnjë tender të marrë nga ana e bizneseve, akuzat janë flluskë sapuni, verifikimet janë bërë nga Prokuroria dhe nuk ka rezultuar asgjë”, tha Leka. Ndërkohë ky i fundit pati edhe një sugjerim për ish- deputetin Alibeaj. “Duhet të ketë parasysh dhe ngjarjet që kanë ndodhur në Gjermani dhe që i ka njerëz të vetët, meqë ka merak ligjin anti- KÇK. Ai po sulmon të tjerët për të mbrojtur njerëzit e vetë”, vijoi Leka.