Aksioni i parë i OFL, nën sekuestro resortin e Hajrit, dosja pasurore në SPAK
Kërkesa për konfiskim do t’i shkojë Prokurorisë së Posaçme, e cila për 15 ditë duhet ta çojë kërkesën në Gjykatë për shqyrtim
Njësia “Operacioni Forca e Ligjit” filloi dje punën në terren, duke vënë nën sekuestro resortin në pronësi të Altin Hajrit në Shijak, i dyshuar për marrjen peng të Jan Prengës në Kamzë.
Ndërkohë, burime thanë dje se janë dërguar informacione për 250 subjektet e para, që pritet që OFL të veprojë dhe kërkojë në Gjykatë sekuestrimin e pasurive. Gjatë ditës së djeshme, punonjës të OFLsë, të veshur me maska dhe të pajisur me automatikë, sekuestruan resortin në Shijak, sekuestrim që ishte bërë më herët edhe nga forcat ekzistuese të Policisë pas hetimeve për pengmarrjen. “Në zbatim të ligjit special për masat pasurore ndaj individëve të dënuar apo akuzuar për krim të organizuar, ‘ Operacioni Forca e Ligjit’ ka vendosur sekuestron e parë mbi objektin kompleksi i shërbimeve ‘ Vila Golden’ dhe mbi një karburant të dhënë me qira një shoqërie për tregtimin e hidrokarbureve, që ndodhet në kryqëzimin Pjezë Xhafzotaj, Shijak, pronë e shtetasit Altin Bajram Hajri”, njoftoi dje Policia e Shtetit.
SEKUESTRIMI Referuar paketës ligjore, të miratuar si akt normativ nga Qeveria, parashikon se me vendosjen e kësaj mase sekuestroje, objekti kalon në administrim të Agjencisë së Administrimit të Aseteve, e cila në bazë të ligjit special është vendosur nën varësinë e Ministrisë së Brendshme. Dosja pasurore e shtetasit Altin Hajri do t’i kalojë menjëherë SPAK- ut dhe në jo më shumë se 15 ditë, SPAK- u duhet t’ia dërgojë Gjykatës Speciale, e cila ka 15 ditë kohë për të konfirmuar masën e sekuestrimit, duke hapur rrugën për konfiskimin përfundimtar të pasurisë së Altin Hajri. Nëse nga Gjykata vendoset konfiskimi i pasurisë, ajo i kalon Ministrisë së Brendshme, që vendos për shfrytëzimin ose shembjen e këtij objekti, si edhe do të marrë në zotërimin e saj dhe do të përdorë për interesin publik paratë, makinat dhe tokat që aktualisht zotërohen nga ky shtetas.
ALTIN HAJRI Sipas Policisë, Altin Hajri është dënuar me burg nga autoritetet italiane të drejtësisë, me urdhërarrestin e datës 15.08.2015, për veprën penale “Trafikimi i lëndëve narkotike, kryer në bashkëpunim”. “Aktualisht, ky shtetas është shpallur në kërkim nga Policia e Shtetit, në funksion të hetimeve për procedimin penal nr. 475, viti 2020, për veprën penale ‘ Rrëmbim ose mbajtje peng e personit, e kryer në bashkëpunim’, ngjarje kjo që lidhet me rrëmbimin e shtetasit J. P.”, njoftoi dje Policia.
ANTI- KÇK Paketa ligjore e që tashmë ka marrë emrin OFL u kontestua gjerësisht, duke u konsideruar dhe si antikushtetuese, megjithatë gjatë ditës së djeshme nisi nga puna. Kjo njësi ka të drejtën që t’i kërkojë
Prokurorisë së Posaçme, SPAK, një sërë masash kufizuese ndaj personave të dënuar ose të dyshuar, si kufizimin e perimetrit të lëvizjes, dëbimin deri në një vit nga një zonë e caktuar administrative, bllokimin e pasaportës ose të daljes jashtë vendit për një periudhë 1- vjeçare. Gjithashtu, subjektet mund të urdhërohen të mos largohen nga banesa ose t’u deklarojnë autoriteteve të Policisë oraret dhe vendet ku mund të gjenden çdo ditë.