Ekstradimi i gylenistit, ministri: U kap me vizë false
"Iu ofrua mundësia e kërkimit të azilit, por ai nuk e pranoi"
Ministri i Brendshëm, Sandër Lleshaj, iu përgjigj dje interpelancës së disa deputetëve të opozitës në lidhje me çështjen e dëbimit të shtetasit turk, Harun Çelik. Interpelancës së kërkuar nga deputeti Artur Roshi, Lleshaj iu përgjigj duke e quajtur atë një vendim administrativ, pasi Çelik ishte kapur me dokumente false në tentativë për të udhëtuar drejt Kanadasë. Sipas ministrit të Brendshëm, shtetasit turk iu ofruan të gjitha mundësitë për të marrë statusin e azilantit, por që ishin refuzuar nga Çelik. "Sa i përket rastit të turkut, dëbimi i të huajve që nuk disponojnë dokumente të rregullta është praktikë e rëndomtë e përditshme, nuk merret vendimi nga ministri, pasi ministri merret me drejtimin politik, dëbimi është vendim administrativ. Ky qytetar ka hyrë ilegalisht dhe do e përdorë për të kaluar në vende të tjera. Masa të tilla merren edhe ndaj shqiptarëve, nëse kalojnë ilegalisht kufirin. Në momentin e dëbimit, nuk ka ngritur pretendime, gjë që vërtetohet se ka firmosur urdhrin dhe kjo mbyll çdo diskutim. Atij iu ofruan të gjitha të drejtat e Kushtetutës për të huajt, mundësitë për të kundërshtuar aktin apo kërkimit të azilit, por ai nuk ka preferuar që të shfrytëzojë këto të drejta", tha ai. Ndërsa deputeti Roshi shtroi shqetësimin se ky rast mund ta kthejë Shqipërinë në një fushëbetejë të përplasjeve gjeopolitike të vendeve të huaja. "Nuk duam që vendi ynë të bëhet fushëbetejë e vendeve të tjera. Ky gjest krijon përshtypjen se Tirana është kthyer në fushën e ideve dhe influencave të huaja për të punuar dhe investuar në vendin tonë. Ky ekstradim me të gjitha prapaskenat është hap pas për integrimin tonë në Europë", tha Roshi.