Debati për KÇK, Balla: Do t'ua nxijmë jetën të fortëve
Hajdari: Niseni me deputetët që nuk justifikojnë pasurinë
Paketa Anti- KÇK e miratuar nga qeveria, me qëllim luftën kundër organizatave kriminale dhe individëve që kanë pastruar paratë përgjatë 30 viteve të fundit, u bë shkak për një përplasje mes kreut të grupit të PS- së, Taulant Balla, dhe deputetes demokrate, Rudina Hajdari.
Me tone shumë të ashpra, Balla tha se me këtë vendim të qeverisë, objektivi është shumë i qartë, që t'i jepet fundi dominimit të personave me të shkuar të errët dhe sekuestrimi i pasurive të tyre të përftuara nga aktivitete të jashtëligjshme. Por nga ana tjetër, deputetja Rudina Hajdari iu kundërpërgjigj, duke vënë theksin te 7 vitet që PS- ja është në pushtet dhe sipas saj e ka pasur kohën e mjaftueshme për ta luftuar krimin e organizuar në çdo shkallë. Për Hajdarin, ky ligj duhet të fillojë me ata deputetë dhe qeveritarë që nuk e justifikojnë pasurinë e tyre.
DEBATI NË KUVEND: Rudina Hajdari:
Realisht nuk e di kush ju ka ndaluar deri më sot të luftoni krimin e organizuar, që sot erdhët dhe e pompuat me këtë akt normativ. Ai ligj është parë e riparë që kur u prezantua nga Kryeministri, pasi ishte antikushtetues dhe po të vihej në dorën e Kryeministrit kuptohej se çfarë do bënte. Ky ligj ishte gati të luftonte çdo kënd, për të mbrojtur disa persona të caktuar. Ju e dini shumë mirë kush janë ata që nuk e justifikojnë sot pasurinë. Duke filluar nga deputetët. Më thoni, e justifikojnë disa nga deputetët apo qeveritarë që janë në sallë pasurinë e tyre? Pse nuk flisni?! Nëse vërtet doni të luftoni krimin, të çoni para Shqipërinë, të hapni negociatat, pse nuk filloni me këta njerëz që kanë vendosur pasuri të jashtëzakonshme dhe nuk i justifikojnë në asnjë moment?!
Taulant Balla: Padyshim, edhe unë nuk dua që t'i ndahem temës së ditës, pasi pashë deputetë të caktuar të opozitës që kishin rezerva, apo mosdakordësi lidhur me paketën ' Anti- KÇK', një ndër aktet ligjore të saj për verifikimin e pasurive të vëna nga grupet kriminale, apo dhe nga veprimtaritë terroriste. Nuk di dhe nuk mund të gjej më përjashtim të opozitës joparlamentare. Ata kanë gjithë të drejtën e tyre ta kundërshtojnë, pasi ata janë kundër çdo gjëje që bëhet në këtë vend. Në asnjë nen nuk keni shkelje kushtetuese, edhe pse këta maskarenj që vijnë nga bota e krimit të organizuar, i nxinë faqen këtij vendi për 30 vite dhe kanë vënë pasuri. Kjo pasuri duhet të sekuestrohet dhe të konfiskohet dhe këto para jo vetëm të shkojnë në të mirë të të ardhurave për Policinë e Shtetit, por dhe në buxhetin e rindërtimit për familjet që sot janë pa shtëpi pas tërmeteve. Unë e mirëkuptoj Lulzim Bashën që po qan sot e gjithë ditën, dhe dje, se qeveria e drejtuar nga Rama, në betejë pa kompromis me krimin e organizuar, ka miratuar këtë akt normativ që Luli nuk e do. Por jo ju ( i drejtohet opozitës parlamentare), pasi qasja juaj ka qenë pro Reformës në Drejtësi. Në këtë frymë, do të doja t'ju ftoja që sapo akti normativ të ketë mbyllur shqyrtimin në komisione, ne do ta ratifikojmë. Ky është një akt normativ që ka një kohëzgjatje më pak se 12- mujore dhe përgjatë këtij procesi, ne duhet t'ia nxijmë jetën të gjithë atyre që bëjnë të fortin në lagje dhe komunitete, dhe që me paratë e ardhura nga bota e krimit kanë ndërtuar apo kanë pasuri që nuk e justifikojnë. Nuk është se po e shpikim ne rrotën në këtë qasje, por është një model që e kanë bërë dhe vende të tjera.