David Sassoli takohet me Metën dhe Ruçin
Presidenti: I rëndësishëm dialogu gjithëpërfshirës e sundimi i ligjit
Presidenti Ilir Meta, në takimin me Presidentin e Parlamentit Europian, David Sassoli, vlerësoi rëndësinë e sundimit të ligjit dhe dialogun gjithëpërfshirës politik. "Kreu i shtetit theksoi rëndësinë që ka sundimi i ligjit dhe dialogu gjithëpërfshirës e jokonfrontues në zbatimin e prioriteteve që lidhen me çeljen e negociatave të Shqipërisë me BE, si dhe për arritjen e standardeve europiane të një demokracie parlamentare. Presidenti mirëpriti gatishmërinë e shprehur nga Presidenti Sassoli për të ndihmuar në tejkalimin e krizës, çka do të çonte në një zbatim më të shpejtë dhe të besueshëm të 9 prioriteteve të Bundestagut", thuhet në njoftimin e shpërndarë për mediat nga presidenca. Sassoli u prit dje dhe nga Kryetari i Kuvendit, Ruçi, i cili, nga ana e tij, i shprehu mirënjohjen për vizionin dhe mbështetjen e fuqishme të integrimit europian të Shqipërisë dhe Ballkanit Perëndimor. "Në sajë të këtij vizioni dhe të këtij qëndrimi, Parlamenti Europian nuk tërhiqet nga pozicioni i palëkundur për të filluar menjëherë, gjatë presidencës kroate, bisedimet me Shqipërinë dhe Maqedoninë e Veriut", tha Ruçi. Nga ana e tij, kreu i PE- së tha në takimin me Ruçin, "Në Shqipëri gjeta një vend të bashkuar rreth perspektivës europiane dhe këtë mesazh do ta përcjell në Bruksel. Uniteti dhe kohezioni në perspektivën europiane është themelore për shpejtimin e hapave të integrimit. Vazhdoni dialogun dhe punoni për shpejtimin dhe thellimin e reformave afatgjata. Sinjalet për luftën kundër korrupsionit dhe krimit të organizuar janë pozitive", vuri në dukje presidenti Sassoli.