OSBE dublon KiE, dërgon në Venecia "Antishpifjen"
Dy projektligjet që përmbajnë paketën "Antishpifje" përfundojnë sërish për opinion në Komisionin e Venecias. Këtë herë e ka çuar përfaqësuesi i OSBE- së për Lirinë e Medias, Harlem Desir. Përfaqësuesi i OSBE- së për Lirinë e Medias, Harlem Desir, shkruan në "Tëitter" se kjo është një mundësi e mirë për të bërë përmirësime të tjera në këtë paketë, para votimit në Parlament. "Kam dërguar në Komisionin e Venecias rishikimet tona ligjore mbi projektligjet e Shqipërisë për Median Audiovizuale dhe Komunikimet Elektronike, pasi Parlamenti shtyu votimin javën e kaluar. Kjo është një mundësi e rëndësishme për të bërë përmirësime të mëtejshme, para një votimi të ri të Parlamentit", shkruan Desir. Kujtojmë që në deklaratat publike para miratimit në Parlament, Kryeministri Edi Rama është shprehur se dy draftligjet janë dakordësuar me ekspertët e BE- së dhe OSBE- së. Ky hap i përfaqësuesit të OSBE- së vjen pak ditë pasi maxhoranca vendosi që të shtynte dekretin e kreut të shtetit në muajin mars, pasi të merrte një opinion nga Komisioni i Venecias. Presidenti Ilir Meta ktheu në Kuvend ligjet për mediat elektronike, duke argumentuar se ishin në shkelje me Kushtetutën. Ndërkohë, kreu i shtetit i dorëzoi një kërkesë "Venecias" për të shqyrtuar këtë paketë, veprim që erdhi dhe nga Komisioni Europian. Komisioni i Venecias ka pranuar që ta shqyrtojë me procedurë të përshpejtuar në sesionin e 21 marsit. Gjatë muajit shkurt, përfaqësues të Komisionit të Venecias do të vijnë në Tiranë. Kujtojmë se paketa "Antishpifje" ka ngjallur reagime dhe përplasje të forta në Shqipëri, pasi është kundërshtuar nga opozita, analistët, gazetarët e shoqëria civile, të cilët e shohin paketën si cenim të fjalës së lirë dhe kontroll të qeverisë ndaj mediave.