Subvencionimi i qirasë, bashkia ndryshon skemën e përfitimit
Afati i gjatë kohor i përfitimit të bonusit të qirasë nga mijëra familje kryeqytetase ka bërë që drejtoria e strehimit pranë bashkisë të hartojë një udhëzues të ri që parashikon kryerjen e një vlerësimi paraprak social- ekonomik për qytetarët që duan të përfitojnë nga skema. Për këtë, ka hartuar edhe një sistem pikëzimi që vlerëson familjet që janë më në nevojë për të përfituar mbulimin e qirasë mujore deri 100%. Përparësi në subvencionimin e qirasë përveç kategorive përfituese të kahershme që lidhen me ata që janë të paaftë të punojnë kanë edhe disa të tjera, si azilkërkuesit, emigrantët e kthyer, punëtorët emigrantë, individët që i përkasin komunitetit LGBTI që viktimizohen për shkak të orientimit të tyre, si dhe të miturit në konflikt me ligjin, pasi kanë përfunduar dënimin. Vlera e subvencionimit të qirasë shkon deri në 100%, në varësi të të ardhurave të familjes dhe kontrata rinovohet çdo vit.
Familja që ka përfituar subvencionin e qirasë mund të dalë nga kjo skemë pas një viti, nëse vërtetohet që ajo ka zgjidhur problemin e strehimit ose nëse të ardhurat e familjes janë rritur mjaftueshëm për të përballuar pagesën e qirasë pa nevojën e bonusit, dhe skualifikohen sipas metodikës së përllogaritjes së qirasë. Ashtu si programi i kredive të buta, edhe bonusi i qirasë kalon në dy faza aplikimi. Së pari, plotësohet formulari për aplikim pranë Njësive Administrative dhe depozitohet në bashki. Së dyti, bëhet seleksionimi i kërkesave pasi dorëzohet lista e dokumentacionit, që vërteton kushtet familjare dhe ekonomike. Përfituesi duhet të lidhë dhe depozitojë në bashki kontratën e qirasë, për të përfituar shumën që i takon. Atij i lihet një muaj kohë për ta bërë këtë. Në të kundërt, e humbet mundësinë e përfitimit.